Almaty oblysynda teri óńdeıtin zaýyt joq - Amandyq Batalov
TALDYQORǴAN. QazAqparat - Almaty oblysynda et óńdeıtin jáne teri óńdeıtin zaýyt joq. Alaıda óńirde 4 mıllıonnan astam qoı bar, dep habarlaıdy QazAqparat tilshisi.
Taldyqorǵanda oblys ákiminiń halyq aldyndaǵy esebi jalǵasýda. Qazir turǵyndar ózderin mazalaǵan suraqtaryn qoıyp jatyr. Turǵynnyń biri oblysqa teri óńdeıtin jáne et óńdeý zaýytyn salý máselesin kóterdi.
«Men ákim bolyp taǵaıyndalǵaly osy máseleni jıi oılaımyn. Kórshilerimizge teri tıyn-tebenge ótkizilip, jóneltilip jatqanyn bilemin. Ózderińiz bilesizder, búgingi tańda Almaty oblysynda ındýstrıaldy aımaqtar salynǵan. Máselen, «Bereke» ındýstrıaldy aımaǵynda germanııanyń «Baýman» kompanııasy iri et óńdeıtin zaýyt salady. Bul kásiporynnyń 100 jyldyq tarıhy bar. Árıne, oblysqa et óńdeıtin jáne teri óńdeıtin zaýyt qajet. Biz bul máseleni sheshemiz», - dedi Almaty oblysynyń ákimi Amandyq Batalov turǵynnyń suraǵyna bergen jaýabynda.
Sondaı-aq, Aqsý aýdanyndaǵy Oıtoǵan aýylynyń turǵyndary aýyz sýdan tarshylyq kórip otyrǵandaryn aıtty.
«Men Іlııas Jansúgirovtiń týǵan jeri Oıtoǵan aýylynyń turǵynymyn. Tirshilik nárinen tarshylyq kórip otyrmyz. Bizde aýyz sý máselesi qashan sheshiledi», - dedi suraq qoıǵan turǵyn.
Óńir basshysy osy másele boıynsha jaýapty mamandarǵa tapsyrma berdi.
«Aýyz sýmen qamtamasyz etý jergilikti jáne respýblıkalyq bıýdjetten qarjylandyrylady. Eger Oıtoǵan aýylyn tirshilik nárimen qamtamasyz etý oblystyq bıýdjetten qarastyrylǵan bolsa, aýyldy aýyz sýmen qamtýdy bıylǵy josparǵa engizińizder», - dedi Amandyq Batalov.
