Almaty oblysynda teńiz deńgeıinen 1200 metr bıiktikte Týymyz jelbiredi

TALDYQORǴAN. QazAqparat - Almaty oblysynyń Tekeli qalasynda teńiz deńgeıinen 1200 metr bıiktikke elimizdiń kók Týy tigildi. 12 maýsym kúni 12 saǵat 12 mınýtta jelbiregen baıraqtyń tuǵyry 12 metr, dep habarlaıdy QazAqparat tilshisi.

Tuǵyry bıik Tý qalanyń «Kóktóbe» dep atalatyn taý baýraıynda ornalasty. Al memlekettik rámizdi kóterý qurmeti álemdik jáne respýblıkalyq dodalarda top jaryp júrgen sportshy jastarǵa berildi. Saltanatty sharaǵa Qazaqstannyń eńbek sińirgen ártisi, kúıshi-kompozıtor Seken Turysbekov arnaıy qatysyp, birneshe shyǵarmasyn oryndap, jyly lebizin bildirdi.

«Bul úlken qýat beretin dúnıe. Endi ózgelerge de juǵysty bolsa deımin. Bireýdiń jetken jetistigine qyzǵanyshpen qarama, qyzyǵyp qara degen osydan týatyn shyǵar. Osydan keıin balalar tipti basqasha shabyt alatyn shyǵar dep oılaımyn», - dedi Tekeliniń tumsa tabıǵatyna erekshe baǵa bergen óner ıesi.

Kenshiler qalasynda Memlekettik týdy ornatý jáne «Kóktóbe» alańyn abattandyrý jumystary «Jumyspen qamtýdyń jol kartasy-2020» memlekettik baǵdarlamasy aıasynda júzege asyryldy. Qala ákimi Baqtııar Ónerbaev aldaǵy ýaqytta shahardyń ortalyǵynda tuǵyry 25 metr bolatyn taǵy bir bıik baıraqtyń jelbireıtinin tilge tıek etti.