Almaty oblysynda «telefon terrorısi» sottaldy
TALDYQORǴAN. QazAqparat - Almaty oblysynyń Talǵar aýdandyq soty terrorızm akt isi týraly jalǵan habarlaǵan azamatty eki jarym jyl merzimge bas bostandyǵynan aıyrýǵa úkim shyǵardy, dep habarlaıdy QazAqparat tilshisi.
2019 jyldyń 25-sáýir kúni saǵat 9:35-te belgisiz bireý Talǵar aýdandyq polıtsııa basqarmasynyń kezekshi bólimine qońyraý shalyp, Talǵar aýdanyndaǵy kentterdiń birinde ornalasqan sý kanalynda jarylǵysh qurylǵy ornatylǵandyǵy týraly habarlaǵan.
«Alynǵan aqparat boıynsha birden qońyraý shalýshynyń jeke basyn anyqtaýǵa jáne ony ustaýǵa baǵyttalǵan jedel-izdestirý is-sharalarynyń kesheni uıymdastyryldy. Jarylǵysh qurylǵyny izdeýge aýdannyń barlyq shuǵyl qyzmetteri qosyldy. Qońyraýdyń uıaly telefonnan kelip túskeni birden anyqtaldy. Birneshe saǵattan keıin osy aýyldyń esh jerde jumys istemeıtin jergilikti 1977 jylǵy azamaty ustaldy. Kúdikti buryn birneshe ret sotty bolǵan.Buǵan deıin ol túrli qylmystardy jasaǵany úshin 8 ret qylmystyq jaýapkershilikke tartylǵan. Sońǵy ret 2016 jyly osyǵan uqsas áreketi úshin , ıaǵnı kórineý jalǵan aqparat bergeni úshin isti bolǵany anyqtaldy. Azamat bas bostandyǵynan aıyrý oryndarynda jazasyn ótegen. Bul oǵan tıisti sabaq bolmaǵanǵa uqsaıdy , sebebi ol 2019 jyly dál osyndaı qylmysqa qaıta baryp otyr», - deıdi Almaty oblysy PD-nyń Ekstremızmge qarsy is-qımyl basqarmasynyń bastyǵy polıtsııa polkovnıgi Rýslan Naızabasov.
Almaty oblysynyń Talǵar aýdandyq sotymen kúdikti azamat QR QK- niń 273-babyna sáıkes, terrorızm aktisi týraly jalǵan habarlaǵany úshin qylmystyq-atqarý júıesi mekemelerinde jazasyn óteýmen 2 jyl 6 aıǵa bas bostandyǵynan aıyryldy.
«Azamattarǵa taǵy da ázil sıpatyndaǵy is- áreketteriniń is júzinde jazalanatyn jáne 2- den 6 jylǵa deıingi bas bostandyǵynan aıyrý túrindegi qylmystyq jaýapkershilikke ákep soǵatynyn resmı túrde eske salǵym keledi . Ádette, mundaı habarlamalardy tekserýge barlyq shuǵyl qyzmetterdiń, sondaı-aq qalanyń jedel qyzmetteriniń kúshi men quraldary maksımaldy túrde jumsalatynyn eskerý qajet»,-dep tolyqtyrdy polkovnık Naızabasov.
