Almaty oblysynda tehnıkalyq baıqaý júrgizýde zańsyzdyqtar anyqtaldy
Bul týraly QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Almaty oblysy boıynsha departamentiniń Sybaılas jemqorlyqtyń aldyn alý basqarmasynyń basshysy Asqar Sadyqov baspasóz máslıhatynda aıtty.
«Ókinishke oraı, Almaty oblysynyń kóliktik baqylaý ınspektsııasy qyzmetiniń jyljymaly beketteri sybaılas jemqorlyq táýekeline beıim sala bolyp otyr. Sońǵy úsh jyl ishinde munda sybaılas jemqorlyq quqyq buzýshylyqtardy jasaǵany úshin kóliktik ınspektsııanyń 9 qyzmetkeri sottaldy. Joǵaryda atalǵan jaǵdaılardyń barlyǵy ınspektsııalyq ujymdaǵy moraldyq-psıhologııalyq ahýalǵa teris áser etedi jáne ınspektsııa men jalpy mınıstrliktiń teris ımıdjin qalyptastyrýǵa yqpal etedi, sondaı-aq halyqtyń memlekettik bılikke degen senimin tómendetedi», - dedi A. Sadyqov.
Sonymen qatar, «Jetisý-adaldyq alańy» jobalyq keńsesimen iri kólemdi kólik quraldarynyń salmaqtyq baqylaý salasynda sybaılas jemqorlyqqa qarsy monıtorıng júrgizilgendigin osy jobanyń menedjeri Araılym Myltyqbaeva málim etti.
Onyń aıtýynsha, monıtorıng aıasynda Almaty oblysy aýmaǵynda júk tasymalyn júzege asyratyn kompanııalardyń ıeleri arasynda anonımdi saýalnama júrgizilgen.
Saýalnamanyń qorytyndysy kórsetkendeı, suralǵandardyń 72% - dan astamy iri gabarıtti kólik quraldaryn salmaqtyq baqylaýdyń qazirgi rásimi sybaılas jemqorlyq kórinisterine beıim dep sanaıdy. Respondentterdiń 65% -y salmaǵy aýyr kólik quralynyń ruqsat etilgen shekti normalarynan asyp ketken jaǵdaılarda máseleni sol ýaqytta sheshkenderin atap ótti. Sonymen qatar, suralǵandardyń 54% -dan astamy mundaı jaǵdaılardyn bolýy júıeli sıpatqa ıe ekenin málimdegen.
Monıtorıng aıasynda anyqtalǵan sybaılas jemqorlyq táýekelderdi joıý maqsatynda «Jetisý-adaldyq alańy» jobalyq keńsesimen tıisti usynystar ázirlengen. Ol qazirgi ýaqytta Almaty oblysy ákimdiginiń qaraýynda.