Almaty oblysynda Táýelsizdik kúnine oraı 50 oryndyq mektep qoldanysqa berildi
TALDYQORǴAN. QazAqparat - Almaty oblysynyń Sarqan aýdanynda Táýelsizdik kúnine oraı 50 oryndyq mektep qoldanysqa berildi, - dep habarlaıdy QazAqparat tilshisi.
Sarqan aýdany ákiminiń baspasóz qyzmetiniń málimetinshe, bıyl aýyl azamattary bas qosqan jıynda biraýyzdan mektep salynady dep shemim qabyldap, qor quryp, qazyǵyn qaǵyp, irge tasyn kóterip bastaǵan.
Bul mektep 1 qabattan turady. Munda 4 oqý kabıneti, úlken zal jáne muǵalimder kabıneti qarastyrylǵan. Sondaı-aq qaýipsizdikti qamtamasyz etý maqsatynda 7 benebaqylaý ornatylǵan.
Búgingi kúni bilim oshaǵynda 15 oqýshy bilim alýda. Al, 5-si synyptan joǵary oqıtyn oqýshylar Baqaly aýylyna qatynap oqıdy.
Jıynda aýdan basshysy Talǵat Qanatuly ulyq merekemen aýyl turǵyndaryn quttyqtap, saltanatty túrde mekteptiń lentasyn qıyp, qonaqtarmen birge barlyq kabınetterdi aralap, aýylmen birge qýanyshtyń kýási boldy.
«Aýyl azamattary mektep salyp beremiz degende qysqa ýaqyt ishinde qoldanysqa beredi dep kútken joqpyz. Tozyǵy jetken burynǵy mektep ǵımaraty 1975 jyly salynǵan. Zaman talabyna saı jabdyqtalmaǵan edi. Endi jańadan salynǵan mektebimiz jyly, jaryq, barlyq qural-jabdyqtarmen qamtylǵan. Qýanyshymyzda shek joq. Bizdiń mindet oqýshylardyń sapaly bilim, tálimdi tárbıe berý úshin jumys isteý. Osy oraıda jańa mektepti salyp beregen barlyq aýyl turǵyndaryna, jalpy jomart jandarǵa alǵysym sheksiz». – dedi mektep meńgerýshisi Sadybaeva Qarlyǵash.
Ustaz osy mektep tabaldyryǵynan shyqqan «Altyn belgi» ıegerleri kóp ekenin atap ótti.
Jalpy aýylda 230-dan asa halyq bar. Jyl saıyn Qazybaev aýylynda bala sany artyp keletindigi baıqalady.
Sonymen qatar, bolashaqta mekteptiń aýlasy qorshalyp, abbattandyrylyp, shaǵyn sporttyq alań jáne balalarǵa arnalǵan oıyn alańqaıyn salýdy josparlaýda.
Aıta keteıik, jalpy mekteptiń qurylys jumystaryna 20 mln.teńge qarajat jumsalǵan.
