Almaty oblysynda taýdaǵy kólderdiń jaǵdaıy tikushaqpen tekserildi
TALDYQORǴAN.QazAqparat – Almaty oblysynda taýdaǵy kólderdiń jaǵdaıy tikushaqpen tekserildi. Mamandardyń pikirinshe, jaǵdaı qalypty, dep habarlaıdy QazAqparat tilshisi.
Jetisýdyń taýlaryn tikushaqpen Almaty oblysynyń bas prokýrory Azamat Jylqybaev, Almaty oblysy ákiminiń birinshi orynbasary Lıazzat Turlashov, oblystyq TJD, «Qazseldenqorǵaý» jáne «Qazgıdromed» qyzmetkerlerimen birlesip tekserip shyqty.
«Qazirgi tańda taýly aımaqtarda qar 10-15 sm qalyńdyqty quraıdy. Eshqandaı qaýip joq. Ózender boıynsha da jaǵdaı birqalypty», - Almaty oblystyq TJD basqarma bastyǵynyń orynbasary Qanat Altynbekov.
Áýeden barlaý jumystary Eskeldi, Aqsý, Sarqan, Alakól aýdandarynyń aýmaǵyn qamtydy. Jaýaptylar taý basyndaǵy qardyń qalyńdyǵyn baǵamdap, muzdyq kólder men ózenderde qalyptasqan jaǵdaıdy saralady. Ásirese, Qyzylaǵash sý qoımasy, Basqan men Sarqannyń toǵysar tusyna basa nazar aýdardy. Al, Tentek ózeniniń boıyna áýe kemesin arnaıy qondyryp, atqarylǵan sharýalardy kórdi. Ótken qysta qatyp, artynsha muz betimen aqqan qyzyl sý Úsharaldyń shetindegi úılerdi shaıyp ketýge shaq qalǵan edi. Jergilikti atqarýshy bılik ókilderi qaýipti seıiltý úshin 6,5 shaqyrymǵa sozylǵan bóget turǵyzdy. Arnasyn tereńdetip, sý ótkizý múmkindigin sekýndyna 14-ten 300 tekshe metrge deıin jetkizgen bolatyn.
«Morenalyq kólderdiń jaǵdaıy qalypty. Sý deńgeıi tómen. Sebebi qazir morenalyq kólder qysqy rejımde jumys isteýde. Qazirgi tańda ol jaqta qar túsip, sýdyń deńgeıi azdaý bolyp jatyr», - dedi «QAZSELDENQORǴAÝ» MM Alataý aýmaqtyq paıdalaný basqarmasy fılıalynyń basshysy Meıram Nurymbetov.
