Almaty oblysynda taýda joǵalǵan bala úsh kúnnen beri izdestirilýde
ASTANA. QazAqparat - Almaty oblysynyń Jambyl aýdanynda joǵalyp ketken balany qutqarýshylar 14 shildeden beri izdestirýde, dep habarlaıdy QazAqparat tilshisi QR ІІM Tótenshe jaǵdaılar komıtetiniń resmı ókili Rýslan Imanqulovqa silteme jasap.
2011 jyly týǵan Ernur Sádýaqas Yntymaq aýylynyń ońtústik qaptalyndaǵy «Kishi saz» jaıylymynyń taýly aýmaǵynda joǵalǵan.
«Tirkelgen oqıǵaǵa baılanysty jedel-izdestirý toby qurylǵan bolatyn. Іzdeý jumystaryna 108 adam men 9 arnaıy tehnıka jumyldyryldy: olardyń 42-i Jambyl aýdandyq ІІB qyzmetkerleri, 50-i Uzynaǵashtaǵy 28237 áskerı bóliminiń áskerı qyzmetshileri, 16-y Jambyl aýdandyq TJB qyzmetkerleri. Sonymen birge, 28237 áskerı bóliminiń áskerı qyzmetshileri izdeý jumystaryna úıretilgen ıtti de jumyldyryp otyr. Alaıda jańbyrǵa jáne ormanǵa hımıkattar shashylǵanyna baılanysty izdi taba almady. Qazirgi tańda barlyq mańaı avtokólikpen de, atpen de tintilip jatyr. Іzdestirý radıýsy orman, taýdy qosqanda 15 shaqyrymdy qamtydy», - delingen habarlamada.
Ázirge izdeý jumystary eshqandaı nátıje bermeı otyr. Biraq, qutqarýshylar barlyq kúsh-jigerin jumsaýda.
