Almaty oblysynda taý-shańǵy kesheni ashyldy
ASTANA. QazAqparat - Talǵar aýdanynda «Oıqaraǵaı Lesnaıa skazka» taý-shańǵy kesheni ashyldy. Qysqy týrızmdi damytý maqsatynda salynǵan keshenniń ashylý saltanatyna oblys ákimi Amandyq Batalov, nysan ınvestorlary, «Qazaq Týrızm» UK ókilderi qatysty, dep habarlaıdy QazAqparat.
Demalýǵa kelgen kishkentaı balǵyndarmen birge oblys ákimi A. Batalov nysannyń lentasyn qıdy.
Memlekettik - jekemenshik áriptestik negizinde júzege asyrylǵan týrıstik joba salamatty ómir saltyn qalyptastyrý, buqaralyq sportty damytýǵy yqpal etpek. Nysannyń osy jáne ózge de erekshelikterine toqtalyp ótken oblys ákimi Amandyq Batalov óz quttyqtaý sózinde keshenniń qysqy týrızmdi damytýdaǵy rólin atap ótti.
- Elbasy oblysqa kelgen saparynda týrızm klasterin qalyptastyrý týraly tapsyrma bergen edi. Sonyń ishinde Shymbulaqtan bastap Túrgen shatqalyna deıingi aralyqta taý týrızmin damytý qajettigin aıtqan bolatyn. Soǵan baılanysty búgin, mine, jańa taý-shańǵy keshenin ashyp otyrmyz. Memleket tarapynan qoldaý kórsetilip, respýblıkalyq mańyzdaǵy avtokólik jolynan keshenge deıingi 6,2 km jolǵa kúrdeli jóndeý jasadyq. Osy taý-shańǵy kýrortyna ınvestor óziniń jeke qarajaty esebinen 60 mln. AQSh dollaryn quıdy. Bul - otbasymen kelip, taýdyń taza aýasymen tynystap, shańǵy teýip, syrǵanap, demalýǵa taptyrmaıtyn oryn. Kelińizder, ıgiligin kórińizder, syrǵanańyzdar, shattanyńyzdar, - dedi A. Batalov.
Munan soń ınvestor, «Alina» kompanııalar tobynyń prezıdenti Erlik Balfanbaev sóz alyp, osy jobany júzege asyrýǵa qoldaý kórsetken oblys basshylyǵyna, «Qazaq Týrızm» UK-ǵa, taý-shańǵy kesheniniń qurylysyna qatysty kásibı aqyl-keńes bergen avstrııalyq áriptesterine, «Alina» kompanııasynyń mamandaryna, qurylysshylarǵa - barlyǵyna rızashylyǵyn jetkizdi.
Taý-shańǵy kesheniniń jalpy aýmaǵy 85 ga. Teńiz deńgeıinen 1500-1800 metr bıiktikte ornalasqan. Munda kelýshiler arnaıy arqan joldarmen bıikke kóterilip, tómenge shańǵymen nemese basqa da quraldarmen syrǵanap túsedi. Atalmysh kompanııanyń kommertsııalyq dırektory Dmıtrıı Tsaıdyń aıtýynsha, munda shańǵy, skeıtbord, úrlemeli kameralarmen syrǵanaýǵa arnalǵan, túrli kúrdeliliktegi 15 arnaıy jolaq qarastyrylǵan. Sonymen qatar shańǵy tebýdi úırengisi keletinder úshin shańǵy mektebi bar, onda shetelden kelgen kásibı mamandar jumys isteıdi. Nátıjesinde 2-3 sabaqtan keıin-aq úırenýshi shańǵy tebýdi meńgerip úlgeredi. Otbasymen belsendi jáne alańsyz demalǵysy keletin azamattardyń kishkentaı balalaryn tańerteńnen keshke deıin jyly jerde baǵyp beretin bala kútýshiler de bar. Munda álemdik brend fırmalardyń syrǵanaýǵa qajetti zattary men kıim-keshegin jalǵa alý múmkindigi usynylady. Demalys aımaǵy kúnine 5000 otandyq jáne sheteldik týrıster men demalýshylardy qabyldaýǵa daıyn.
Jaz mezgilinde shańǵy joldary velosıped tebýge laıyqtalady. Demalýshylarǵa túrli ulttyń as-aýqatyn ázirleıtin 6 meıramhana, 99 oryndyq qonaq úı qyzmet kórsetedi. Aldaǵy jyldary qazirgi 13 shaqyrymdyq syrǵanaý jolaqtarynyń uzyndyǵyn 40 shaqyrymǵa deıin jetkizý jospary bar.
