Almaty oblysynda tas-qum óndiretin kásip ıelerine 2 mln teńge aıyppul salyndy
TALDYQORǴAN. QazAqparat - Almaty oblysynda karerlerdiń sanıtarlyq-qorǵaý aımaqtarynyń kólemin buzǵan sýbektilerge ákimshilik sharalar qoldanyldy, - dep habarlaıdy QazAqparat tilshisi.
Almaty oblysy boıynsha departament jáne Eńbekshiqazaq aýdandyq sanıtarlyq-epıdemıologııalyq baqylaý mamandary qurylys tasy men qum óndirýmen aınalysatyn keıbir kásipkerlerge qatysty jospardan tys tekserýler júrgizdi.
«Tekserý nátıjeleri paıdaly qazbalardy óndirý boıynsha karerlerdiń menshik ıeleri karerlerden nemese usaqtaý-suryptaý jabdyqtarynan jaqyn mańdaǵy turǵyn úılerge deıin sanıtarııalyq - qorǵaý aımaqtarynyń (SQA) mólsherin elemeıtinin kórsetti. Bul tikeleı jaqyn jerde turatyn halyqtyń densaýlyǵyna qaýip tóndirýi múmkin. Departament jáne onyń aýmaqtyq basqarmalary aı saıyn eldi mekender aýmaǵynda qorshaǵan ortaǵa monıtorıng júrgizý sheńberinde jerústi kózderinen, topyraqtan, atmosferalyq aýadan, shýdan, radıatsııalyq fonnan alynǵan synamalarǵa zerthanalyq zertteýler júrgizedi. Osylaısha, monıtorıng barysynda Eńbekshiqazaq aýdany Baltabaı aýyldyq okrýginiń saıajaı aýmaǵynda qum-qıyrshyq tas qospasyn óndirý boıynsha karerlerdiń janynda ornalasqan shý deńgeıiniń artqany anyqtaldy»,- delingen Almaty oblystyq sanıtarııalyq-epıdemıologııalyq baqylaý departamentiniń baspasóz qyzmeti taratqan habarlamada.
Osyǵan baılanysty turǵyndar tarapynan túsken shaǵymǵa sáıkes jospardan tys tekserý júrgizilgen.
«SQA mólsherlerin saqtamaý faktileri anyqtaldy. Óıtkeni karerdiń aýmaǵy saıajaı ýchaskelerine tikeleı jaqyn ornalasqan. Budan basqa, menshik ıeleri SQA shekarasynda zerthanalyq óndiristik baqylaýdy uıymdastyrý jáne júrgizý jónindegi talaptardy saqtamaǵany, SQA negizdeý jobalaryna, qum-qıyrshyq tas qospasyn qıyrshyqtas t. b. sııaqty daıyn qurylys materıaldaryna qaıta óńdeýge sanıtarııalyq-epıdemıologııalyq qorytyndylar bolmaǵany anyqtaldy.
Anyqtalǵan sanıtarlyq-epıdemıologııalyq talaptardy buzý nátıjeleri boıynsha kináli tulǵalarǵa jalpy somasy 1 779 370 teńge aıyppul salyndy. Óndiristik obektilerge sanıtarııalyq-epıdemıologııalyq qorytyndysyz kásipkerlik qyzmetpen aınalysqany úshin ákimshilik isterdiń materıaldary sot organdaryna berildi»,- dep tolyqtyrdy atalǵan vedomstvonyń baspasóz qyzmeti.
