Almaty oblysynda tárkilengen 500-den asa qarý balqytýǵa jiberildi
TALDYQORǴAN. QazAqparat - Almaty oblysynda tárkilengen 500-den astam qarý joıylýǵa jiberildi. Polıtseıler aldymen olardy bólshektep, sosyn aramen kesip, qarýlanǵan kúzet kómegimen balqytýǵa jóneltti, dep habarlaıdy QazAqparat tilshisi.
«Joıylý aldynda kez kelgen qarý aldymen barlyq bazalarda tekseriledi, onyń tarıhy aıqyndalady. Balqytýǵa jiberilmeı turyp, olar bólshektelip, budan keıin atýǵa jaramas úshin uńǵysy isten shyǵarylady. Bıyl 500-den astam qarý joıylýǵa jiberildi. Endi olardan el ıgiligi úshin paıdaly ónimder quıylatyn bolady», - dedi Almaty oblystyq Polıtsııa departamentindegi Tylmen qamtamasyz etý basqarmasynyń bastyǵy Baqyt Alpysov.
Vedomstvonyń aqparatyna sáıkes, byltyr 3581 dana tárkilengen qarý men 6000 astam oq-dári jáne 57 birlik jarylǵysh zat joıylǵan.
Aıta ketý kerek, keıbir sırek kezdesetin qarý túrleri arnaıy ruqsatqa sáıkes murajaılarǵa eksponat retinde qoıylýy múmkin.
