Almaty oblysynda tapa-tal túste shaǵyn nesıe berý ornynan aqsha urlaǵan kúdikti ustaldy
TALDYQORǴAN.QazAqparat - Almaty oblysyy Talǵar aýdanynyń 29 jastaǵy turǵyny aýdan ortalyǵyndaǵy saýda úıinde shaǵyn nesıe berý mekemesine jasyrynyp kirip, aqsha urlap jatqan jerinen ustaldy, dep habarlaıdy QazAqparat tilshisi.
Mekeme qyzmetkerleri shaqyrýsyz kelgen qonaqty ustap, onyń qaltalarynan urlanǵan qarjyny alyp jatqan sát túsirilgen beınejazba áleýmettik jelide tarady. Oqıǵa ornyna shaqyrylǵan tártip saqshylary resmı derekti tirkep, kúdiktiniń tulǵasyn anyqtady. «Atalǵan derekke qatysty QR Qylmystyq kodeksiniń 188-babyna sáıkes sotqa deıingi tergeý amaldary júrgizilýde. Kúdikti mekenjaıyn ózgertpeý týraly mindettememen bosatyldy. Onyń budan ózge qylmystarǵa qatysy bary anyqtalýda», - dep atap ótti oblystyq PD baspasóz qyzmeti.
Aldyn ala tergeý barysynda kúdiktiniń buǵan deıin de urlyq jasap, qylmystyq jaýapkershilikke tartylǵany belgili boldy. Tús mezgilindegi úzilisti paıdalanǵan ol shaǵyn nesıe berý mekemesiniń kassasynan 50 myńnan astam teńgeni jymqyryp, kıimderine jasyrǵan.
Polıtsııa taratqan aqparat boıynsha, bıyl Almaty oblysy aýmaǵynda ózgeniń múlkin urlaýdyń 5 myńnan astam deregi ashylyp, 10 mıllıon 600 myń teńgeden astam materıaldyq shyǵyn óndirilgen. Onyń ishinde, jyl basynan beri Talǵar aýdanynda 724 urlyqqa qatysy bar tulǵalar anyqtalyp, qoldanystaǵy zańnamaǵa sáıkes jaýapkershilikke tartylǵan.
