Almaty oblysynda tamaq ónimderiniń 37%-y qaýipsizdik normalaryna sáıkes kelmeıdi
Negizgi zerthanalyq baqylaý halyq arasynda kúndelikti suranysqa ıe tamaq ónimderine baǵyttalǵan. Bul - sút, et ónimderi, qus eti, kondıterlik ónimder. Sondaı-aq, oıynshyqtardyń, balalar men jasóspirimderge arnalǵan taýarlardyń, jeńil ónerkásip ónimderiniń qaýipsizdigin baqylaýǵa erekshe nazar aýdaryldy.
«Sáıkes kelmeıtin synamalardyń jalpy sanynan tamaq ónimderine – 37%, taýarlardyń ónerkásiptik tobyna - 63% keledi. Sáıkes kelmeıtin ónimdi óndirýshi elder arasynda otandyq óndirýshiler úlesine-9%, EAEO elderine - 28%, basqa elderden ákelinetin - 63% (2021 jylǵy 6 aıda - 65%).
Tamaq ónimderiniń ishinde sáıkessizdikterdiń eń kóp paıyzy sút jáne sút ónimderine, qus etine - 8%-dan, balyq ónimderine - 7%, et ónimderine - 6%, qalǵan túrlerge 1-den 3% -ǵa deıin keledi»,- delingen Almaty oblystyq sanıtarııalyq-epıdemıologııalyq baqylaý departamenti baspasóz qyzmetiniń habarlamasynda.
Vedomstvonyń aqparatyna sáıkes, monıtorıng nátıjeleri zerttelgen oıynshyqtardyń 53%-y tehnıkalyq reglamentterdiń talaptaryna sáıkes kelmeıtinin kórsetti. Oıynshyqtardyń sáıkes kelmeıtin synamalarynyń 99%-da tańbalanýynyń buzýshylyqtary anyqtalǵan. Tańbalaý boıynsha jıi kezdesetin buzýshylyqtar - taýardyń ataýy, daıyndaýshynyń (daıyndaýshy ýákilettik bergen tulǵanyń), ımporttaýshynyń ataýy men ornalasqan jeri, daıyndalǵan kúni, EAS belgisi týraly aqparattyń bolmaýy nemese orys jáne memlekettik tilderde aqparattyń múlde bolmaýy.
Sonymen qatar, Qytaıda shyǵarǵan óndirýshileri belgisiz 3 jastan asqan balalarǵa arnalǵan oıynshyqtardyń 5 úlgisinde formaldegıd pen basqa hımııalyq zattardyń (stırol, ksılol, benzol) artyq mólsheri anyqtaldy ( «GT.POLICE CAR» «SUPER RACING SET» kólikter jıyntyǵy, «THUNDEGYRO», «CHO-Z ACHILLES.OO.Dm» ushatyn dısk, «LOL» qýyrshaǵy, SURPRISE, JK, MINI FASHION DOLL, «Girls Toys» «Piay Set» «Bring Endless Joy» «To the Children» ydys-aıaq jıyntyǵy, «Toys Toys», PLEASE RECYCLE sý tapanshasy).
Sonymen qatar, formaldegıd mólsheriniń artýy óndirýshisi belgisiz balalarǵa arnalǵan taýarlardyń 1 synamasynan tabyldy («Mıkımaýs» shomylýǵa arnalǵan vannasy).
Al, balalar men jasóspirimderge arnalǵan kıimderdi baqylaý nátıjeleri zerttelgen úlgilerdiń 80%-y tehnıkalyq reglamentterge sáıkes kelmeıtinin kórsetti. 94% jaǵdaıda tańbalaýy buzylǵan ónimder Túrkııa, QHR, Qyrǵyzstan, Ózbekstan sııaqty elderden ákelindi nemese belgisiz óndirýshilermen óndirilgen.
«Jalpy, 2022 jyldyń 6 aıynda buzýshylyqtardyń anyqtaý faktileri boıynsha kásipkerlik sýbektileriniń atyna buzýshylyqtardy joıý týraly 80 uıǵarym berildi. Sáıkes emes ónimdi óndirýshiler men ımporttaýshylarǵa 44 habarlama jiberildi. Júrgizilgen jumystyń nátıjesinde sharýashylyq júrgizýshi sýbektiler 88,62 kg tamaq ónimderin, 36 dana taýarlardy satýdan alyp, jetkizýshilerge qaıtardy»,- dep tolyqtyrdy atalǵan vedomstvonyń baspasóz qyzmeti.