Almaty oblysynda talapkerlerge 90 mln teńgege jýyq memlekettik baj tólemi qaıtaryldy
TALDYQORǴAN. QazAqparat - Almaty oblysy sottaryndaǵy daýdy medıatsııa tártibimen retke keltirý týraly kelisimge kelý sharty boıynsha talapkerlerge 90 mıllıonǵa jýyq teńge kólemindegi memlekettik baj tólemi qaıtaryldy, dep habarlaıdy QazAqparat tilshisi oblystyq sottyń baspasóz qyzmetine silteme jasap.
Onyń ishinde, basym bóligi Mamandandyrylǵan aýdanaralyq ekonomıkalyq sotymen - 59 439 286 teńge, Qarasaı aýdandyq sotymen - 14 857 878 teńge jáne Taldyqorǵan qalalyq sotymen 3 284 709 teńge qaıtaryldy.
Taldyqorǵan qalalyq sotynyń tatýlastyrýshy-sýdıasy Sara Jańbyrbaevanyń aıtýynsha, rettelgen daýlardyń kópshiligi - qaryzdy ótep alý men neke-otbasylyq qatynastardan shyǵatyn daýlar. Orta eseppen sýdıa eki kúnde 1 medıatsııa protsedýrasyn júrgizip, bul jalpy sottyń júktemisin tómendetken. Búgingi kúni Sara Jańbyrbaeva taraptardy 168 is boıynsha tatýlastyrǵan, ıaǵnı 336 tarap daýly jaǵdaıdyń beıbit jolmen sheshilgenine qanaǵattandy.
Tek bir aptanyń ishinde, Almaty oblysy boıynsha MAES-ymen mıllıondaǵan aqsha qarajatyn óndirý týraly daýdy medıatsııa tártibimen retke keltirý boıynsha eki kelisim bekitilgen.
Taǵy da aıta ketetin jaıt, memlekettik baj tólemi - qaıtarylatyn, daýlar men daýly jaǵdaılardy retteýdiń alternatıvti ádisterin belsendi túrde qoldaný, tatýlastyrý rásimderi ınstıtýtynyń qoǵam arasynda damýyndaǵy birden-bir bastamasy.
Medıatsııa rásimderin qoldanýdyń maqsaty – ekonomıkalyq kózqaras jaǵynan taraptarǵa túsinikti bolatyn, daýlardyń sotqa deıingi rettelýi eki taraptyń da talabyna qatysty ózara tıimdi sheshim shyǵarý. Sondaı-aq, sot isine ketýi múmkin ýaqyt pen seriktestik qarym-qatynasty saqtap qalýǵa múmkindik beretin biryńǵaı sot praktıkasyna arnalǵan sharttardy qurý bolyp sanalady.
