Almaty oblysynda tabıǵatqa 6 mln teńgege jýyq zalal keltirilgen
TALDYQORǴAN. QazAqparat - Bıyl 10 aıda Almaty oblysynda zańsyz ań jáne balyq aýlap, orman qoryna qol suqqandarǵa qatysty 600-ge jýyq derek tirkeldi. Olar tabıǵatqa 6 mln teńgeden astam zalal keltirgen, dep habarlaıdy QazAqparat.
Bul zań buzý faktilerin Almaty oblystyq orman sharýashylyǵy jáne janýarlar dúnıesi aýmaqtyq ınspektsııasynyń mamandary reıdtik sharalar barysynda anyqtady. Negizinen ań jáne balyq aýlaý maýsymy kezinde brakonerler qyzyl kitapqa engen ań-qusty atyp, ruqsat etilgen mólsherden tys balyq aýlaý barysynda qolǵa túsedi, deıdi mamandar.
Osyndaı reıdtik sharalardyń biri oblystyq tabıǵatty qorǵaý polıtsııasy mamandarymen birlesip, Qaratal, Lepsi ózenderi boıymen Balqash kóline deıin tikushaq arqyly júrgizildi. Shara barysynda Úshtóbe qalasy mańyndaǵy kúrish alqaptarynda ańshylyq jasap júrgen adamdar kózge tústi. Tikushaq qonǵansha eki azamat qarý men oljasyn qamys arasyna jasyryp úlgergen. Alaıda memlekettik ınspektorlardyń qyraǵylyǵynyń arqasynda zań buzǵandardyń qylmysy áshkerelendi. Nátıjesinde qarý men atylǵan qyrǵaýyl tárkilenip, myltyq ıesine ákimshilik is qozǵaldy. Sebebi onyń ańshy kýáligi men myltyǵynyń qujaty bolǵanymen, belgili bir jerde ań-qus atýǵa lıtsenzııasy joq. Reıd barysynda Qaratal jaǵasynda muzdaı qarýlanǵan, úsh jol talǵamaıtyn kólikke mingender toqtatyldy. Olardyń barlyq qujattary túgel, biraq bireýi ań atýǵa lıtsenzııasyn alyp úlgermegen. Oǵan quzyrly organ ókilderi eskertý jasady. Eger dál osyndaı jaǵdaı qaıtalanatyn bolsa, ákimshilik jaza qoldanylady, deıdi Qaratal aýdandyq ІІD Tabıǵatty qorǵaý polıtsııasynyń ókili ıÝrıı Toqtarov. Tártip saqshysynyń aıtýynsha, qazirgi tańda ańshylar zamanaýı jabdyqtarmen qamtylǵan. Olarda jerseriktik baılanys, radıobaılanys, bıikten baqylaıtyn beınekameralar men jol talǵamaıtyn myqty kólikter bar. Sondyqtan bir azamattardy tekserip úlgergenshe, olar óz serikterine belgi berip úlgeredi.
Osyndaı birlesken reıdtik sharalar barysynda memlekettik ınspektorlar jyl basynan beri 587 zań buzý faktisin tirkegen. Zańbuzýshylarǵa 6 mln teńgege jýyq aıyppul salyndy. Almaty oblystyq orman sharýashylyǵy jáne janýarlar dúnıesi ınspektsııasynyń bólim basshysy Rınat Qumashevtyń pikirinshe, negizinen zań buzý qarapaıym tártipterdi saqtamaýdan bastalady. Máselen ańshy belgili bir jerde ań atýǵa shyqsa, onyń ruqsat qujattary, ańshylyq sharýashylyǵy basshysynyń qandaı ań atýǵa ruqsat bergeni týraly lıtsenzııasy bolýy kerek. Sondaı-aq balyq aýlaýǵa shyqqan árbir azamatqa bes keli balyq aýlaýǵa ǵana ruqsat etiledi. Jáne onyń qarmaqtaryndaǵy kúrshek sany beseýden aspaý kerek.
Jalpy Almaty oblysy aýmaǵynda 10 aıda Zańdy belshesinen basqan 10 adamǵa qylmystyq is qozǵaldy. Eki adam sottaldy. Taǵy eki adamnyń isi qaralyp jatyr.
