Almaty oblysynda sýarmaly jerlerdi qalpyna keltirýge 153 mlrd teńge jumsalady
Oblys ákimi Qanat Bozymbaevtyń aıtýynsha, qaraýsyz, qoldanystan shyǵyp qalǵan sýarmaly jerlerdi aınalymǵa tartý - agrarly-ındýstrıaldy aımaq úshin mańyzdy baǵyttyń biri.
Osyǵan baılanysty 2025 jylǵa deıin oblysta jalpy somasy 153,4 mlrd teńgege qaıta jańǵyrtý jáne kúrdeli jóndeý arqyly 114 myń gektar sýarmaly jerdi qalpyna keltirý josparlanýda.
Bul sýarmaly jerlerden aýyl sharýashylyǵy óniminiń jalpy jıynyn 35 paıyzǵa arttyrýǵa, shamamen 9,5 myń jumys ornyn ashýǵa múmkindik beredi.
Qanat Bozymbaev turǵyn úı-kommýnaldyq sharýashylyq jáne ınfraqurylymdy damytýdyń ózekti máselelerine nazar aýdardy.
Sonyń ishinde tozyǵy jetken sý júıelerin jańartý, eldi mekenderdi gazdandyrýdy jalǵastyrý, Taldyqorǵan qalasynyń ınjenerlik-kóliktik ınfraqurylymyn damytý, kezekte turǵandardy sapaly jáne qoljetimdi turǵyn úımen qamtamasyz etý, sonymen qatar ishki ister organdary qyzmetkerlerine turǵyn úı tólemderin berý, turǵyndardy sapaly saıajaı massıvteriniń problemalaryn sheshý baǵyttary da qamtyldy.
«Oblystaǵy saıajaılar máselesin keshendi túrde qarastyrý kerek. Oblysta barlyǵy 705 saıajaı bar, onyń 674-i nemese 95,6%-y Almaty aglomeratsııasy aımaǵynda ornalasqan. Saıajaılarda 214 myń adam turady. Bıýdjet qarjysy men jeke ınvestıtsııany tarta otyryp, Talǵar, Іle, Eńbekshiqazaq, Qarasaı aýdandarynda jańa turǵyn úı salý men ınfraqurylym júrgizý arqyly olardy qonystandyrý kerek nemese saıajaılarǵa eldi meken mártebesin berý qajet. Biz osy másele qatysty is-qımyl josparyn ázirlep jatyrmyz, tıisti usynystar engiziletin bolady», - dedi Qanat Bozymbaev.
