Almaty oblysynda sý sharýashylyǵy boıynsha 4 nysandy jańǵyrtýǵa 3 mlrd teńge bólindi
Olar - Kóksý men Qaratal bógetteri, Panfılov aýdanynyń Ósek sý toraby jáne Taldyqorǵan qalasynyń sýarý jelileri.
Almaty oblysy ákiminiń baspasóz qyzmetiniń málimetinshe, osy jumystarǵa respýblıkalyq bıýdjetten 3,662 mlrd. teńge bólindi. Sonyń nátıjesinde 2300 ga sýarmaly jerdi qalpyna keltirý josparlanǵan.
Oblystyq aýyl sharýashylyǵy basqarmasy Almaty oblysynda 2016 jyldan beri sýarmaly jelilerdi qaıta qurý arqyly alańy 137,8 myń gektar sýarmaly jerlerdi qalpyna keltirý baǵdarlamasy iske asyrylyp jatqanyn aıtty. Búgingi kúni osy maqsatta oblystyq bıýdjetten 3,1 mlrd. teńgege sýarý jelilerin qaıta jańartýdyń jobalyq-smetalyq qujattamasyn ázirleý jumystary bastaldy.
2019 jyldan bastap Islam Damý Bankiniń qarajaty esebinen Aqsý, Alakól, Eskeldi, Kóksý aýdandarynyń sýarý jelilerin qaıta jańǵyrtý jobalary iske asyrylýda. Osy tórt aýdanda barlyǵy 35,4 myń ga sýarmaly jer qalpyna keltiriledi.
Kommýnaldyq menshiktegi sý sharýashylyǵy obektilerin kúrdeli jóndeý de nazardan tys qalmaıdy. Jyl saıyn sý sharýashylyǵy nysandaryn kúrdeli jóndeýge 1,5-2,0 mlrd. teńge qarajat bólinýde.
Bıylǵy jyly 11 sý sharýashylyǵy - Raıymbek aýdanyndaǵy Úkirshi magıstraldy kanaly, Jambyl aýdanyndaǵy Dostyq, Qutyrǵan, Knıjevskıı, Talap Sasyqbaı sý qoımalary, Іle aýdanyndaǵy Qyzyl tý-1, Qyzyl tý-2 toǵandary men K-32 sý qoımasy, Qarasaı aýdanyndaǵy Oktıabr-2 sý qoımasy, Talǵar aýdanyndaǵy tómengi Qutentaı sý qoımasy, Kerbulaq aýdanyndaǵy Enkól jáne Aral tóbe sý qoımalary kúrdeli jóndeýden ótkiziledi.
Sonymen qatar jańa sýarmaly jerlerdi aınalymǵa tartýdy kózdeıtin «2028 jylǵa deıin sýarmaly jerlerdi damytý jospary» da bar. Soǵan sáıkes oblysta jańadan 81,8 myń. ga sýarmaly jerlerdi iske qosý mejelengen. Ol úshin óńirdiń 10 aýdanynda 5 jańa sý qoımasy, ırrıgatsııalyq júıeler, sorǵy stantsııalary men uńǵymalardyń qurylystary jáne qaıta jańartý jumystary júzege asyrylmaq.
Sondaı-aq Uıǵyr aýdanyndaǵy Suńqar jáne Tıirmen sý qoımalaryn salýǵa tehnıka-ekonomıkalyq negizdeme ázirleýge oblystyq bıýdjetten 41,7 mln. teńge, al Eskeldi aýdanyndaǵy Balyqty ózeninde sý qoımasy qurylysyna TEN ázirleýge 32,5 mln. teńge bólindi. Sarqan aýdany Basqan ózenindegi Pokatılovka sý qoımasyn salý maqsatynda «Energomost» JShS ınvestory 128,0 mln. teńgege TEN ázirledi. Qazir jobalyq-smetalyq qujattar daıyndalýda. Aqsý aýdanyndaǵy Búıen ózenindegi sý qoımasynyń qurylysy úshin TEN ázirleý úshin bastapqy derekterdi jınaý jumystary júrgizilýde.
Taǵy bir atap óterligi, búgingi kúni 5,9 mlrd. teńgege Aqsý aýdanyndaǵy Qyzylaǵash sý qoımasyn qalpyna keltirý jumystary aıaqtaldy. Sýarmaly alqap alańyn 6900 gektarǵa deıin ulǵaıtý úshin quny 8,5 mlrd. teńge bolatyn sýarý jelilerin salýdyń jobalyq-smetalyq qujattary daıyn.
Aıta keteıik, Almaty oblysynda jalpy uzyndyǵy 17 myń shaqyrymdy quraıtyn ırrıgatsııa júıesi bar. Bul - respýblıkadaǵy aýqymdy kórsetkish. Soǵan sáıkes óńirde sý sharýashylyǵy salasyndaǵy qalpyna keltirý isi júıeli júrgizilip keledi.
