Almaty oblysynda sý qoımasy salynady
TALDYQORǴAN.QazAqparat -Almaty oblysynyń Sarqan aýdanynda sý qoımasy salynady. Basqan ózeninen syıymdylyǵy 80 mıllıon tekshe metrlik jasandy kól qurylysy keler jyly bastalady, dep habarlaıdy QazAqparat tilshisi.
Gıdronysan iske qosylsa sýarmaly alqaptardyń aýmaǵy ulǵaıady. Onyń ústine qoıma janynan shaǵyn sý elektr stantsııasyn salý da josparlanyp otyr. Mamandar bul shara óńirdegi jaryq qunyn arzandatýǵa yqpalyn tıgizedi deıdi.
«Qazgıprosýshar» ınstıtýty qurylystyń tehnıkalyq-ekonomıkalyq negizdemesin daıyndap qoıǵan. Sý qoımasy Ekiasha aýylynyń mańynda ornalaspaq. Sondyqtan mekeme ókilderi men aýdan basshylary eldi meken turǵyndaryn jınap jobanyń paıdasyn túsindirdi.
«Sý qoımasy salynyp, qyzmetine kirisse, Aqsý qant zaýytyn shıkizatpen qamtamasyz etýge úlken múmkindik týary anyq. Aqsý men sarqandyq sharýalardy paıdaǵa kenelter daqyl qant qyzylshasy ekeni belgili. Endeshe tátti túbir kólemin arttyrý jaǵynan alǵanda, bul qoımanyń basty mindeti dıqandardy sýdan esh taryqtyrmaý»,- deıdi «Qazgıprosýshar» mekemesiniń dırektory Anatolıı Rıabtsev.
Ázirge gıdronysannyń tehnıka-ekonomıkalyq negizdemesi daıyn. «Qazgıprosýshar» ınstıtýty jobany jan-jaqty zerttep, jumys isteý júıesin qaǵazǵa túsirdi. Sý qoımasyn salýǵa 8 mlrd. teńgeden astam qarjy jumsalady dep josparlanǵan. Qurylysy keler jyly bastalyp, 2020 jylǵa qaraı aıaqtalady.
