Almaty oblysynda sońy daýǵa ulasqan aýyl ákiminiń saılaýy qaıta ótetin boldy

QONAEV. QazAqparat - Almaty oblysynda aýyl ákimin saılaý barysynda bir adamnyń saılaý jáshigine birneshe bıýlletendi salý faktisi anyqtaldy, dep habarlaıdy QazAqparat tilshisi.

Zańbuzýshylyq Talǵar aýdanynyń Tuzdybastaý aýyldyq okrýgindegi №860 saılaý ýcheskesinde boldy.

Belgisiz turǵynnyń saılaý jáshigine bıýlletenderdi toptap salyp jatqan áreketin ózge adam vıdeoǵa túsirip alyp, áleýmettik jelige jarııalaǵan. Osy jaıttan keıin tekserý júrgizildi. Nátıjesinde atalǵan ýchaskedegi zańbuzýshylyq rastalyp, ondaǵy daýys berý nátıjeleri joıyldy.

«Zańsyzdyqqa jol bergen saılaý ýchaskesindegi jaǵdaı boıynsha daýys berý nátıjesi joıylǵanymen, saılaýda eń kóp daýys jınaǵan kandıdat anyqtaldy. Óıtkeni, bul okrýg boıynsha 5 saılaý ýchaskesi bar. Sonyń tórteýiniń qorytyndysy boıynsha kandıdat 1990 jyly týǵan Ómirzaq Jalǵasbaı eń kóp daýys jınady. Ol buǵan deıin Tuzdybastaý aýyldyq okrýginiń ákimi orynbasary qyzmetin atqarǵan. Biraq ol óz erkimen aýyl ákimi qyzmetinen bas tartty», - dedi QazAqparat tilshisine Almaty oblysy ákiminiń baspasóz qyzmetiniń ókili Ǵalymurat Júkel.

Vedomstvo ókiliniń sózinshe, saılanǵan ákimniń bas tartýyna baılanysty endi qańtar aıynda Tuzdybastaý aýyldyq okrýginde aýyl ákimin saılaý qaıtadan uıymdastyrylady.