Almaty oblysynda «Sonar-2017» qusbegiler jarysy máresine jetti
TALDYQORǴAN. QazAqparat - Almaty oblysynda «Sonar-2017» qusbegiler jarysy máresine jetti, dep habarlaıdy QazAqparat tilshisi.
Búrkitshiler arasynda ótken saıysta astanalyq Serikbol Kúntýǵan І-oryndy qanjyǵalasa, Atyraý oblysynan kelgen Arman Qoshqarov ІІ-oryndy, Jambyl oblysynan kelgen Serikbolsyn Jalǵasuly ІІІ-oryndy ıelense, Almaty oblysynyń abyroıyn qorǵaǵan Abzal Áben VІ-oryndy qanaǵat tutty.
Al qarshyǵashylar arasynda ótken jarysta Beksultan Seıtjan І-oryndy, Renat Myrzabaev ІІ-oryndy ıelendi. Jambyl oblysynan kelgen Berikbolsyn Babajan ІІІ-orynǵa taban tiredi. Jeńiske jetkenderdiń barlyǵy marapattalyp, aqshalaı syı-sııapatqa ıe boldy.
Almaty oblysynda «Sonar-2017» qusbegiler dodasy Taldyqorǵanǵa jaqyn jerdegi Syrymbet aýylynyń mańynda ótti. Bıylǵy saıys Qazaqstan Respýblıkasy rámizderiniń 25 jyldyǵy jáne «Jalaıyr Shora» atyndaǵy qusbegiler mektebiniń 30 jyldyǵy aıasynda uıymdastyryldy.
Dodaǵa Qazaqstannyń ár aımaǵy men Qytaı jáne Mońǵolııa elinen 100-den astam qusbegi qatysty. Olar 70-ke jýyq búrkit, qarshyǵa, ıtelgi men bıdaıyq syndy qustardy baptap ákeldi. Saıys eki kezeńde ótti.
Jarystyń alǵashqy kúninde qusbegiler shyrǵaǵa salý, qoıan aýlaý ónerimen synǵa tústi.Al aqtyq dodada qusbegiler búrkitterin túlkige salyp jarysty. Tóreshiler bul joly qyran qus pen qusbegi arasyndaǵy qarym-qatynasqa da nazar aýdardy.
Fotony túsirgen Maksım Zolotýhın
