Almaty oblysynda «Shógen» oıyny qaıta jańǵyrýda
TALDYQORǴAN.QazAqparat - Almaty oblysynda «Shógen» oıyny qaıta jańǵyrýda. Búgin Talǵar aýdanyndaǵy Aqbulaqqa jınalǵan qaýym jańasha úlgidegi at sporty men saıatshylyq ónerin tamashalap qaıtty, dep habarlaıdy QazAqparat tilshisi.
"Polo" - bul shógen oıynynyń álemdik ataýy. Derek boıynsha, kezinde bul sport túrin bizdiń ata babalarymyz oılap tapqan. Búginde dúnıe júziniń 80-ge jýyq eli osy sport túrimen aınalysady. Bizdiń elde 2015 jyly arnaıy federatsııa qurylyp, Talǵar aýdanynda shógen ortalyǵy ashylǵan. Búginde munda Jetisý jeriniń namysyn qorǵap júrgen qos komanda bar.
Bir sózben aıtqanda Shógen - at ústinde taıaqpen dop qýyp oınaıtyn oıyn. Hokkeıge uqsaıdy. Alaıda ár taıymy jeti mınýttan turatyn bul oıynda qaqpa bolǵanmen, qaqpashy bolmaıdy. Tártip erejeleri de ózgeshe.
«Árbir gol salynǵannan keıin komandalar qaqpasymen aýysady. Sondyqtan árbir dop kirgen kezde mindetti túrde eki jaq aýysyp otyrady», deıdi «Shógen» oıyny federatsııasy dırektorynyń orynbasary Aıdyn Jákejanov.
«Rýhanı jańǵyrý degen tek mádenı kópshilik is sharalar ǵana emes, bizdiń babalarymyzdan qalǵan, búginde umyt bola bastaǵan, nemese azaıyp ketken sporttyń da túrlerin biz jaryqqa shyǵarýymyz kerek. Kórsetýimiz kerek, damytýymyz kerek, aıtýymyz kerek. Qanatyn keńge jaıdyrýymyz kerek. Sol úshin de búgin bárin jınap osyndaı shara ótkizip jatyrmyz», -dedi oblys ákiminiń orynbasary Jaqsylyq Omar.
Sharaǵa kelgender búrkitti qoldaryna qondyryp, ushyryp qyzyqtady. Jınalǵandar saıatshylyq ónerdiń qyr-syryna da qanyq boldy.
