Almaty oblysynda sheteldikter páterdi 5 mln teńgege tonap ketti
TALDYQORǴAN. QazAqparat - Almaty oblysynda páterden quny 5 mln teńgege baǵalanǵan zergerlik buıymdardy urlady degen kúdikpen gastarbaıterler ustaldy, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, 26 tamyz kúni saǵat 19:00-de Talǵar aýdandyq ishki ister bólimine Tuzdybastaý aýylynyń 31 jastaǵy turǵyny aryzdanǵan. Ol terezeni syǵymdap ashý arqyly quny 5 mln teńgege baǵalanǵan zergerlik buıymdary urlanǵanyn jetkizgen. Atalǵan fakti QR QK-si 188-babynyń 3-bóligi boıynsha tirkelip, polıtseıler oqıǵa ornyna shyqty.
«Birinshi kúmán kórshi úıde jóndeý jumystaryn júrgizgen Ózbekstan azamattaryna tústi. Bul adamdar qylmys jasaǵannan keıin birden jasyrynǵan. Jedel izdestirý is-sharalary barysynda Almaty qalasyndaǵy lombardtardyń birinen urlanǵan zattardyń basym bóligi tabyldy. Zergerlik buıymdardy tapsyrýshylardyń kelbeti izdestirilip jatqan gastarbaıterlerdiń belgilerimen sáıkes keldi», - dedi Talǵar AІІB bastyǵynyń orynbasary Andreı Býrıanskıı.
Tártip saqshylarynyń sýretteýleri boıynsha izdestirý nátıjesinde Almaty qalasynyń Jasyl bazar aýdanynda 2 kúdikti ustalyp, keıin qylmystaryn moıyndaǵan. Urlanǵan zergerlik buıymdardyń kóp bóligi zańdy ıesine qaıtaryldy. Kúdiktiler ýaqytsha ustaý ızolıatoryna qamaldy. Qalǵandaryna qatysty izdeý jalǵasýda.
