Almaty oblysynda shet eldik azamattardy zańsyz jumysqa tartqandar jazalandy
TALDYQORǴAN. QazAqparat - Shet eldiń azamattaryn zańsyz jumysqa tartqan Almaty oblysynyń 7 turǵynyna aıyppul salyndy, dep habarlaıdy QazAqparat tilshisi.
«Nelegal» atty respýblıkalyq aldyn alý sharalary barysynda oblystyq ІІD polıtseıleri kóshi-qon zańnamalaryn buzǵandardy anyqtaýda jumysyn kúsheıtti. Kóshi-qon polıtsııasy, ýchaskelik polıtseıler men patrýldik qyzmet ókilderinen arnaıy toptar qurylyp, oblys aýmaǵynda reıd uıymdastyryldy. Sharanyń birinshi kúninde 430-dan astam shet el azamattary kóshi-qon zańdaryn buzǵany úshin jaýapkershilikke tartyldy. 126 adam ákimshilik qamaýǵa alyndy. 40-tan astam sheteldikke sot úkimi shyǵarylyp, óz elderine qaıtaryldy. Tekserý barysynda tártip saqshylary zańsyz eńbek kúshiniń bazaryn, eki azamattyq alý, shet el azamattarynyń zańsyz jumys júrgizýi men qazaqstandyqtardyń da kóshi-qon zańdaryn buzý faktilerin anyqtady.
Jergilikti 40 turǵynǵa iri kólemde aıyppul salynyp, olardyń 7-eýi ózge el azamattaryn zańsyz jumysqa tartyp otyrǵandyǵy áshkerelendi. Sondaı-aq jergilikti qabyldaýshy-bólýshi mekemelerine jeke basyn kýálendiretin qujaty joq 47 adam jetkizildi. Olardyń basym bóligi qańǵybastyqpen jáne qaıyr tileýmen aınalysqan. Taǵy birneshe shet el azamatyna qylmystyq óndiris qozǵalyp, QR QK 393 babyna sáıkes elden kóshirildi. Polıtseılerdiń «Nelegal» aldyn alý sharasy Qazaqstan aýmaǵynda áli birneshe kún jalǵasady.
