Almaty oblysynda sheneýnikter 1 kitap jıyntyǵyn 58 mln teńgege satyp almaq bolǵan

TALDYQORǴAN.QazAqparat - Almaty oblysyndaǵy Sarqan aýdanynyń bilim bólimi 1 kitap jıyntyǵyn 57 mln 976 myń teńgege satyp alýdy josparlaǵan. Al onyń ortasha naryqtyq baǵasy – 670-2000 teńge aralyǵynda, - dep habarlaıdy QazAqparat tilshisi.

Óreskel zań buzýshylyqty Almaty oblysy boıynsha Sybaılas jemqorlyqqa qarsy qyzmeti «Satyp alýdyń biryńǵaı terezesi» veb-portaly arqyly anyqtap, toqtatty. Keıin mekeme 8 663 dana kitapqa 5 mln teńge kórsetti. Alaıda, baǵany ósirý derekteri tyıylar emes. Máselen, oblystyq ishki saıasat basqarmasyna qarasty «Qoǵamdyq kelisim» mekemesi bıýdjet qarajatynan 33 mln teńgege saýalnama júrgizýdi josparlaǵan. Jedel áreket etý nátıjesinde memlekettik mekeme satyp alýdan bas tartty.

Antıkorrýptsııalyq qyzmet ókilderi bes aıda memlekettik mekemelerge osy tektes 47 usynym joldanǵan.

«Bes aıdyń qorytyndysyna sáıkes negizsiz satyp alý salasy boıynsha 972 mln teńge bıýdjetke qaıtaryldy. Osyǵan oraı biz mekeme basshylary men memlekettik satyp alýshylardyń biliktiligin arttyrýǵa baǵyttalǵan semınarlar ótkizip jatyrmyz. Tanymdyq sabaqtarda zańnamalyq jáne qarjylyq saýattylyq arttyrý nusqaýlyqtarymen jiti tanystyrdyq», - dedi oblystyq departament basqarmasynyń basshysy Asqar Sadyqov.

Eske salsaq, departamenttiń der kezinde áreket etýiniń arqasynda 2021 jyly 10 mıllıard teńgeden astam bıýdjet qarajaty únemdelgen.