Almaty oblysynda sheneýnik basqarǵan qylmystyq top quryqtaldy

ASTANA. QazAqparat - Almaty oblysynda óńirlik kóliktik baqylaý ınspektsııasy basshysynyń orynbasary basqarǵan uıymdasqan qylmystyq toptyń qyzmeti áshkerelendi, dep habarlaıdy Memlekettik qyzmet isteri jáne sybaılas jemqorlyqqa qarsy is-qımyl agenttigi Feısbýktegi resmı paraqshasynda.

«Almaty oblysy boıynsha Sybaılas jemqorlyqqa qarsy is-qımyl ulttyq bıýrosy ulttyq qaýipsizdik komıtetiniń departamentimen birlese otyryp, oblystyq kóliktik baqylaý ınspektsııasy basshysynyń orynbasary basqaratyn uıymdasqan qylmystyq toptyń qyzmetin toqtatty. Óziniń qylmystyq áreketine ol ózine baǵynyshty 4 qyzmetkerdi - ınspektsııanyń bas mamandaryn tartqan. Onyń ústine Almaty qalasy boıynsha kólik ınspektsııasynyń 4 mamany onyń qylmystyq áreketterine qatysqan» delingen habarlamada.

Málimetke saı, qylmystyq shemaǵa Kóliktik baqylaý ınspektsııasy basshysynyń orynbasaryn qosa alǵanda barlyǵy 9 adam tartylǵan. Olar qylmystyq top quramynda jeke kólik kompanııalarynyń ókilderinen Almaty oblysy men Almaty qalasy avtomagıstraldyq joldarynda iri gabarıtti júkterdi tasymaldaý erejesin buzý boıynsha ákimshilik sharalardy qabyldamaý úshin júıeli negizde para alǵan degen kúdikke ilindi.

Uıymdasqan qylmystyq toptyń qylmystyq kirisi aı saıyn shamamen 6 mıllıon teńgeni quraǵan.

Qazirgi ýaqytta kúdiktiler ustaldy jáne ýaqytsha qamaý abaqtysyna toǵytyldy.