Almaty oblysynda shatyry qulaǵan sport kesheniniń shyǵyny anyqtaldy
TALDYQORǴAN. QazAqparat - Almaty oblysy Shonjy aýylynda salynyp jatqan dene shynyqtyrý-saýyqtyrý kesheniniń shyǵyny anyqtaldy. Óńir basshysy Amandyq Batalov ortalyq kommýnıkatsııalar qyzmetinde bergen esebinde shyǵyn kólemi shamamen 70-75 mln teńgege baǵalady, dep habarlaıdy QazAqparat tilshisi.
Almaty oblysynyń ákiminiń aıtýynsha Elbasy tapsyrmasymen qazir ár aýdanda dene shynyqtyrý-saýyqtyrý kesheni salynyp jatyr.
«Bul baǵytqa bıýdjetten qarjy qarastyrylǵan. Sondaı nysandardyń biri Shonjy aýylynda salynýda. Alaıda merdiger kinásinen shatyr qulady. Biz ol jerge komıssııa jiberdik. Qazaq qurylys jáne sáýlet ǵylymı zertteý ınstıtýtynyń mamandary sheshim shyǵardy . Olar jobalyq sheshimdi buzǵan. Metall qurastyrmalardyń túıisken jerlerin tómendetip jiberip, shatyr qulady. Qaıta oqıǵa ǵımarat salynyp jatqan kezde boldy. Mundaı olqylyqtarǵa jol bermeý kerek. Avtorlyq jáne tehnıkalyq qadaǵalaý ókilderi jiti baqylyp otyrý kerek», - dedi Amandyq Batalov.
Sondaı-aq oblys basshysy qurylys jumystaryn Túrkistan oblysyndaǵy Saryaǵashtan utyp alǵanyn, al jobalaýshy mekeme Jezqazǵan qalasynan ekenin atap ótti.
«Men olardy jumys isteı almaıdy demeımin. Biraq mundaı isti qolǵa alǵan soń sapaly jasaý kerek. Másele quny – olar bárin ózderi qalpyna keltirý kerek. shyǵyndardy eseptedik. Shamamen 70-75 mln teńge. Biz olarǵa jumysty ýaqytynda aıaqtaý kerek ekenin eskerttik. Eger olar nysandy belgilengen merzimde aıaqtamasa aıyppul salynady. Odan keıin mundaı jaýapsyz merdigerdiń mundaı jumystarǵa múldem tartpaý týraly másele kóteretin bolamyz», - dedi óńir basshysy.
Esterińizge sala ketsek, Uıǵyr aýdanyndaǵy Shonjy aýylynda salynyp jatqan sport kesheninde úshinshi bloktiń shatyryn jaýyp jatqanda metall ferma qulady. Qulaǵan blok aýmaǵy – 1058,4 sharshy metr. Zardap shekkender men qaza bolǵandar joq.
