Almaty oblysynda shatyry qulaǵan sport kesheniniń qurylysy áli toqtap tur
TALDYQORǴAN. QazAqparat - Almaty oblysynyń Uıǵyr aýdanynda shatyry opyrylyp ortasyna túsken sport kesheniniń qurylysy áli toqtap tur, dep habarlaıdy QazAqparat tilshisi.
Al qujat boıynsha bul nysan 2021 jyldyń birinshi qańtarynda tapsyrylýy tıis bolǵan. Qazir qurylysyna 1 mlrd teńgeden asa qarajat bólingen dene shynyqtyrý-saýyqtyrý kesheninde tym-tyrys. Kúzetshiden basqa eshkim joq.
«Qazirgi tańda tehnıkalyq negizdemesin kútip otyrmyz. Qulaǵan úshinshi blok qaıtadan turǵyzylady. Munan bólek birinshi jáne ekinshi bloktardyń irgesin kúsheıtý jumystary júrgiziledi. Keltirilgen shyǵyndardy merdiger kásiporyn ózi óteıdi»,- dedi Almaty oblystyq Qurylys basqarmasynyń bólim basshysy Aıat Sábıtov.
Esterińizge sala keteıik, osydan bes aı buryn Uıǵyr aýdanynda salynyp jatqan sport kesheni opyrylyp qulady. Abyroı bolǵanda eshkim zardap shekken joq. Tekserý barysynda qatelikti jobalaýshylar da, qurylysshylar da jibergeni anyqtaldy. Mamandar shatyrdyń qulaýynan 55 mln teńge kóleminde shyǵyn kelgenin aıtady.
