Almaty oblysynda sharýalar abaısyzda jylyjaılaryn órtep alǵan - TJK
NUR-SULTAN. QazAqparat - QR ІІM Tótenshe jaǵdaılar komıtetiniń bastyǵy Vladımır Bekker elimizde sý tasý kezeńi aıaqtalǵanymen, órt qaýpi jaǵdaıy jaqyndap kele jatqanyn málim etti, dep habarlaıdy QazAqparat tilshisi.
«23 sáýirde órt qaýpine daıyndyq máselesi boıynsha Úkimet otyrysy ótedi. Kúni keshe ǵana elimizdiń ártúrli óńirlerinde tabıǵı órt jaǵdaılary tirkeldi. Tilsiz jaý aýyzdyqtaldy. Dese de, sý tasqyny kezeńinen endi óte bastaǵanda órt qaýpi máselesi týyndap otyr. Nelikten? Sebebi, eski qurǵaq shóp jer betine shyǵyp qaldy. Kók shóp ósip úlgermeıdi. Keı jaǵdaıda kisilerdiń abaısyzdyq tanytýy da tilsiz jaýdyń týyndaýyna sebep bolyp jatatynyn aıta ketý kerek. Mysaly, ótken joly ǵana Almaty oblysynda sharýalar eski shópti órteımin dep, jylyjaılary qosa órtenip ketti», - deıdi Vladımır Bekker.
Komıtet tóraǵasynyń aıtýynsha, órt jaǵdaılary ásirese demalys kúnderi jıi tirkeledi.
«Baý-baqsha egetinder dál osy demalysta qoqys órtep, ottaryn sóndirmeı ketip qalady. Onyń arty qaýipti jaǵdaılarǵa ákelip soǵyp jatady. Meniń oıymsha, aldaǵy eki aptada kók shóp ósip shyǵyp, órt qaýpiniń deńgeıi de tómendeıdi. Munyń bári de - maýsymdyq jaǵdaılar», - deıdi Vladımır Bekker.
Eske sala ketsek, búgingi baspasóz máslıhatynda Vladımır Bekker barlyq óńirlerde sý deńgeıi tómendep jatqanyn habarlaǵan bolatyn.
