Almaty oblysynda sekseýildi zańsyz kesken er adam ustaldy
TALDYQORǴAN. QazAqparat - Almaty oblysynda polıtsııa qyzmetkerleri Balqash aýdanynyń 41 jastaǵy turǵynyn ustady. Oǵan sekseýil aǵashtaryn zańsyz kesti degen kúdik ketirilip otyr, dep habarlaıdy QazAqparat.
Oblystyq tabıǵat qorǵaý polıtsııasynyń qyzmetkerleri Balqash aýdanyna qarasty Bereke aýylynda GAZ-53 markili kóligin toqtaty. Kóliktiń borty sekseýil aǵashyna toly bolǵan. Júk kóliginiń ıesi tártip saqshylaryna sekseýil aǵashyn kesýge jáne ony tasymaldaýǵa ruqsat beretin eshqandaı qujattardy kórsete almady. Osyǵan baılanysty ol aýdandyq polıtsııa bólimshesine jetkizildi.
«Ustalǵan kólikten 3 tekshe metrden astam jańa otalǵan jas sekseýil aǵashy alyndy. Al bul aǵashty kesýge Qazaqstan zańdary boıynsha 2023 jylǵa deıin shekteý qoıylǵan. Memleketke keltirilgen zııan ázirge anyqtalýda. Osy oqıǵa boıynsha qylmystyq is qozǵaldy. Tergeý amaldary bitkenshe, kúdiktige qajetti ýaqytta polıtsııa bólimine kelip turý jóninde talap qoıyldy»,-dep habarlady Almaty oblystyq Polıtsııa departamentiniń tabıǵat qorǵaý polıtsııasy bóliminiń bastyǵy Erlan Qujaqov.
Vedomstvo ókilderi sonymen qatar, óńirde 14 aqpannan bastap, «Brakoner» saýyqtyrý sharasy júrip jatqanyn jáne onyń barysynda zańsyz aǵash kesý jaǵdaıy boıynsha 8 qylmystyq is qozǵalyp, 10 tekshe metr aǵash tárkilengenin jetkizdi.
