Almaty oblysynda saılaý joǵary deńgeıde ótti - halyqaralyq baıqaýshy
TALDYQORǴAN. QazAqparat - Almaty oblysynda QR Parlamenti Senatynyń depýtattaryn saılaýǵa jergilikti máslıhat depýtattarynyń 98 paıyzy qatysty. Bul jolǵy saıası doda eki úmitkerdiń arasynda ótti. Saılaý barysyn Ońtústik Koreıa men kórshiles Reseıden kelgen 14 halyqaralyq baıqaýshy baqylap, áleýmettik jeli arqyly tikeleı efırge shyǵyp otyrdy. Ońtústik Koreıadan kelgen halyqaralyq baıqaýshy Chae Sýdýk saılaýdyń joǵary deńgeıde ótkenin aıtty, dep habarlaıdy QazAqparat.
«Búgingi saılaý maǵan óte unady. Barlyǵy saılaý zańyna saı, ashyq túrde ótti. Eshqandaı zańbuzýshylyqty baıqamadym. Adamdardyń júzderi jarqyn, kóńilderi kóterińki, mereke ekeni sezilip-aq tur», deıdi Chae Sýdýk.
Saılaýǵa qatysyp, óz tańdaýyn jasaǵan 327 depýtattyń 298-i Nurlan Naýryzuly Qylyshbaevqa daýys berdi. Osyndaı basymdyqqa ıe bolǵan ol Parlamenttiń Joǵarǵy palatasyna depýtat bolyp saılandy. Al onyń qarsylasy óz kezeginde búgin ózine senim bildirip, úlken úmit artqan jergilikti máslıhat depýtattaryna alǵysyn bildirdi.
«QR Parlamenti Senatynyń depýtattyǵyna úmitker retinde qatystym. Men úshin ashyq túrde barlyǵy ótti. 29 depýtat daýys berdi. Barlyǵyna rahmet aıtqym keledi. Osylaı qoldap, úmit artyp, maǵan óz daýystaryn bergenine rahmet», dedi úmitker Erkebulan Ómirzaqov.
Esterińizge sala keteıik, bul jolǵy Senat saılaýyna Almaty oblysy boıynsha 6 úmitker usynylyp, olardyń tek ekeýi ǵana tirkeldi. Olar ózderine belgilengen ýaqytta óńirdi aralap saılaýshylarymen kezdesti. Baǵdarlamalaryn tanystyrdy.
