Almaty oblysynda saıası qýǵyn-súrgin qurbandaryna mýzeı salynady
TALDYQORǴAN.QazAqparat - Bıyl Almaty oblysynyń Talǵar aýdanynda saıası qýǵyn-súrgin qurbandaryna arnalǵan mýzeı salynady. Bul jóninde óńir basshysy Amandyq Batalov halyq aldyndaǵy esebinde málim etti, dep habarlaıdy QazAqparat tilshisi.
«Aǵymdaǵy jyly bıýdjeti 6 mlrd teńgege jýyq 159 iri shara men jobalar uıymdastyrylady. Onyń ishinde Panfılov aýdanynda «Orbulaq» memorıaldyq kesheni, Talǵar aýdanynda saıası qýǵyn-súrgin qurbandaryna arnalǵan mýzeı salynady», - dedi Amandyq Batalov.
Jalpy ótken jyly Almaty oblysynda «Rýhanı jańǵyrý» baǵdarlamasy aıasynda 8 myń is-shara uıymdastyrylyp, 1 mln astam adam qamtylǵan. Al «Týǵan jer» arnaıy jobasy sheńberinde iske asyrylatyn 218 jobanyń 90 jobasy aıaqtalyp, 6,6 mlrd teńge ıgerilgen. Sondaı-aq oblysta teńdesi joq «Batyr babalar» mýzeıi salynyp, Tuńǵysh Prezıdent - Ult kóshbasshysynyń «Atameken» tarıhı-mádenı ortalyǵy ashylǵan bolatyn.
