Almaty oblysynda saýda ortalyǵynda balany tepken sheteldik qamaýǵa alyndy

QONAEV. QazAqparat - Almaty oblysynda saýda, oıyn-saýyq ortalyqtarynyń birinde 4 jasar búldirshindi teýip qulatqan Túrkııa azamaty eki aıǵa qamaýǵa alyndy. Bul týraly oblystyq Polıtsııa departamentiniń basshysy Baýyrjan Álenov málim etti, dep habarlaıdy QazAqparat tilshisi.

«Sotqa deıingi tergep-tekserý júrgizý kezeńine balany tepken er adam eki aı merzimge qamaýǵa alyndy», - dep jazdy Baýyrjan Álenov áleýmettik jelidegi paraqshasynda.

Qazirgi ýaqytta saraptama taǵaıyndalyp, barlyq qajetti tergeý áreketteri júrgizilip jatyr.

«Іs boıynsha tergeý barysy meniń qatań baqylaýymda. Ózge aqparat QR Qylmystyq-protsessýaldyq kodekstiń 201-baby negizinde jarııa etýge jatpaıdy», - dep atap ótti vedomstvo basshysy.

Eske salaıyq, birer kún buryn Qarasaı aýdanyndaǵy saýda, oıyn-saýyq ortalyqtarynyń birinde er adam 2019 jyly týǵan beıtanys balaǵa dene jaraqatyn salǵan bolatyn.

K. esimdi azamatshanyń aryzy negizinde derek QR Qylmystyq kodeksiniń 293-baby 1-bóligi (buzaqylyq) boıynsha aýdandyq polıtsııada tirkeldi. Jedel-izdestirý is-sharasy barysynda tártip saqshylary Túrkııa Respýblıkasynyń 25 jastaǵy azamatyn dereý anyqtap, polıtsııaǵa jetkizdi.

Bala quqyqtary jónindegi ýákil Dınara Zákıeva «Buzaqylyq» baby boıynsha is qozǵalǵanyn aıtty. Jazasyn munda ótegennen keıin sheteldik el aýmaǵynan shyǵarylady.

Keshe Túrkııa Respýblıkasynyń Qazaqstandaǵy elshiligi keleńsiz jaǵdaıǵa qatysty pikir bildirdi.

«Almatyda kishkentaı balaǵa qatysty bolǵan kúsh kórsetý oqıǵasyn ókinishpen estidik. Zorlyq-zombylyqtyń eshbir túrin, qalaı jáne kim jasaǵanyna qaramastan qabyldamaıtynymyzdy jetkize otyryp, kishkentaı balaqaı men onyń otbasyna tez saýyǵyp ketýin tileımiz», - dep jazdy Túrkııa elshiligi áleýmettik jelide.