Almaty oblysynda salyq tólemegenderdiń kólikteri aıyp turaǵyna qoıyldy
TALDYQORǴAN. QazAqparat - Almaty oblysy boıynsha memlekettik kirister departamenti quzyrly organdarmen kólik salyǵyn tólemeı júrgen azamattarǵa reıd uıymdastyrdy. Shara barysynda 200-ge jýyq júrgizýshiden salyq óndirilip, 15 avtokólik aıyp turaǵyna qoıyldy, dep habarlaıdy QazAqparat tilshisi.
Reıdtik sharalar Almaty oblysynyń ońtústik aımaǵynda júrgizildi. Atap aıtqanda, Qulja, joǵary Talǵar, Almaty-Bishkek tas jolynyń 19 shaqyrymy jáne joǵary Qaskeleń tas joldaryndaǵy kólikter tekserildi. Eki kúnde qyzmetkerler 15 mln teńgeden astam kólik salyǵyn óndirdi. 198 kólik júrgizýshi bereshegin toqtatylǵan jerde ótese, salyqty óreskel tólemeı júrgen 15 azamattyń kóligi aıyp turaǵyna jetkizildi. Árbir avtokólik ıesine kólik salyǵyn tóleý boıynsha salyq zańnamasynyń normalary túsindirildi.
Almaty oblysy boıynsha Memlekettik kirister departamenti 2019 jyly jeke tulǵalardan kólik quraldaryna salyq tóleý merzimi 2019 jyldyń 31 jeltoqsanynda aıaqtalatynyn eske salady.
