Almaty oblysynda «Salbýryn-2019» saıatshylar men ańshylar jarysy ótti
TALDYQORǴAN. QazAqparat - Almaty oblysynda saıatshylyq pen ańshylyq ónerdi dáripteýge baǵyttalǵan «Salbýryn-2019» qusbegiler baıqaýy ótti. Oǵan elimizdiń ár óńirinen 25 ańshy qatysty dep habarlaıdy QazAqparat tilshisi.
Elbasy Nursultan Nazarbaevtyń «Uly dalanyń jeti qyry» atty baǵdarlamalyq maqalasy aıasynda uıymdastyrylǵan shara dástúrli qusbegiler jarysynan ózgerek boldy. Ańshylar «Jetisý», «Altaı», «Arqa», «Erenqabyrǵa» jáne «Tarbaǵataı» atty 5 topqa bólinip, dodaǵa tústi. Saıys eki kúnge sozyldy. Alǵashqy kúni qusbegiler qustaryn, ańshylar qumaı tazylaryn babyna keltirip, keshqurym ańshylar qosynda as ázirlep, túnniń bir ýaǵyna deıin ańshylyq pen saıatshylyq týraly áńgime órbitti. 
Jarystyń ekinshi kúni ańshylar attaryn erttep, tazylaryn ertip, qustaryn qolǵa qondyryp, taý tasty aralap ketti. «Arqa» komandasy 1 túlki men 1 qoıan aýlasa, «Jetisý» komandasy 3 qoıan men 3 qyrǵaýyl alyp, qanjyǵasyn maılady. Taǵlymy mol, rýhanı azyq bolar sharany uıymdastyrýshy - respýblıkalyq «Qyran» federatsııasy men Almaty oblystyq sport jáne deneshynyqtyrý basqarmasy.
Jarys qortyndysy boıynsha «Jetisý» komandasy úzdik shyǵyp, arnaıy kýbokqa ıe boldy. Ańshylar men qusbegilerdiń kóńilinen shyqqan shara keler jyly da jalǵasyn tappaq.
