Almaty oblysynda sábı kirjýǵysh mashınada tunshyǵyp óldi
TALDYQORǴAN. QazAqparat - Almaty oblysynda bir jarym jastaǵy sábı kirjýǵysh mashınanyń ishinde sýǵa tunshyǵyp óldi. Qaıǵyly oqıǵa Kerbulaq aýdanynyń Jolaman aýylynda boldy, dep habarlaıdy QazAqparat tilshisi.
Belgili bolǵandaı kirjýǵysh mashına jartylaı avtomat rejiminde jumys isteıdi.
«Anasy dalaǵa shyǵyp ketken ýaqytta qyz bala kishkentaı oryndyqqa shyǵyp, qulap ketken. Sol sátte kirjýǵysh mashına sýǵa tolyp turǵan», - dedi oblystyq ІІD-niń baspasóz qyzmetinen.
Mamandardyń málim etýinshe, jaǵdaı abaısyzda bolǵan. Biraq sábıdiń naqty neden ólgeni sot-medıtsınalyq saraptamadan keıin belgili bolmaq. Qazir tergep-tekserý jumystary júrgizilip jatyr.
