Almaty oblysynda prokýrorlar jer telimderiniń bóliný zańdylyǵyn tekserdi

TALDYQORǴAN. QazAqparat - Taldyqorǵan qalasynda oblys prokýrorynyń  tóraǵalyǵymen jáne oblys ákiminiń qatysýymen jer qatynastar salasynda biryńǵaı zań qoldaný tájirıbıesin ázirleý máselesi boıynsha alqa otyrysy ótti. Oǵan oblystyń jergilikti atqarýshy jáne ýákiletti memlekettik organdarynyń basshylary qatysty, - dep  habarlaıdy QazAqparat oblys prokýratýrasynyń baspasóz qyzmetine silteme jasap.

Prokýratýra ákimdikterdiń jer qatynastary salasyndaǵy jumysynyń tıisti deńgeıde atqarylmaıtyndyǵyn, jer ýchaskelerin usyný kezinde kóptegen zań buzýshylyqtarǵa jol berilgendigin atap ótti.

Taldyqorǵan qalasynda jer zańnamasy men orman zańnamasy talaptaryn saqtamaı orman jer qorynan jeke turǵyn úı salýǵa 12 jer ýchaskesi  berilgeni anyqtaldy.

Talǵar aýdanynda Respýblıkalyq jersindirý-karantındik kóshettiginiń jer ýchaskesi 0,43 gektarǵa qysqartylyp, jeke  qosalqy sharýashylyq júrgizý úshin 5 jer ýchaskesine bólinip berilgen.

Atalǵan derekter boıynsha tergep-tekserý sharalary bastaldy.

Sonymen qatar, bul jerlerdi memleket menshigine qaıtarý boıynsha sharalar qolǵa alyndy.

Bıylǵy jyldyń 6 aıynda prokýrorlar 53 tulǵany túrli jaýapkershilikke (tártiptik, ákimshilik) tartty, memleketke kadastrlyq quny 324,5 mln. teńge 10 myńnan astam ga jer ýchaskesi qaıtaryldy.

Alqa qorytyndysy boıynsha jergilikti atqarýshy jáne ýákiletti memlekettik organdarǵa jer salasyndaǵy zańdylyqty qamtamasyz etý baǵytynda naqty tapsyrmalar berildi.

Sonymen qatar, qoldanystaǵy jer zańnamasyna sáıkes kásipkerlik maqsatyndaǵy jerler tek saýda-sattyq arqyly usynylady (Jer kodeksiniń 48-baby), al jeke turǵyn úı qurylysy úshin arnalǵan tegin ýchaskeler kezektilik tártibimen beriledi (Jer kodeksiniń 44-1-baby).

 Osyǵan baılanysty joǵaryda kórsetilgen ýchaskelerdi zańnamamen belgilengen talaptardy saqtamaı usyný zańsyz ekendigin prokýratýra qyzmeti eskertti.

"Buzýshylyqpen berilgen jerler memleket menshigine qaıtarylýy tıis",-delingen vedomstvanyń taratqan resmı aqparatynda.