Almaty oblysynda polıtsııamen tóbelesken turǵyn izdestirilip jatyr

TALDYQORǴAN. QazAqparat - Almaty oblysynda Eńbekshiqazaq aýdandyq aýrýhanasynyń áınegin syndyryp, polıtsııamen tóbelesken er adam sol jerden qashyp ketken, dep habarlaıdy QazAqparat tilshisi.

Almaty oblystyq Polıtsııa departamenti baspasóz qyzmetiniń málimetinshe, Eńbekshiqazaq aýdandyq aýrýhanasynan polıtsııaǵa shaǵym túsken. Ol jerde er adam medıtsına qyzmetkerlerin balaǵattap, áınekti syndyrǵandyǵy jóninde aryzdanǵan. Anyqtalǵandaı janjaldy Túrgen aýylynyń 45 jastaǵy turǵyny shyǵarǵan.

«Ol jerge barǵan ýchaskelik ınspektor rasymen er azamattyń qoǵamdyq tártipti buzyp jatqanyn anyqtady. Tártip saqshysy er adamdy sabyrǵa shaqyrǵan. Biraq talapqa baǵynbaǵan ol polıtseıdiń betinen urǵan. Al dalada sol áreketterin qaıtalap, taǵy da soqqy jasaǵan. Artynsha qashyp ketken. Qazir kúdiktige qatysty Qylmystyq kodekstiń 293-baby 2-bóligi 2-tarmaǵy boıynsha qylmystyq óndiris qozǵaldy. Qazir kúdiktini ustaý jumystary júrip jatyr»,- delingen Almaty oblystyq Polıtsııa departamenti baspasóz qyzmetiniń habarlamasynda.

Vedomstvonyń aqparatyna sáıkes, kúdiktiniń ústinen 293-bap ıaǵnı, buzaqylyqpen qosa, 380-bap ıaǵnı, bılik ókiline qatysty kúsh qoldaný baby boıynsha qylmystyq óndiris qozǵaldy.