Almaty oblysynda polıtsııada qyzmet etken maıdangerler qurmetteldi
TALDYQORǴAN. QazAqparat – Almaty oblysynda Ekinshi dúnıejúzilik soǵysqa qatysyp, keıingi jyldary ishki ister organdarynda qyzmet etken Sembek Qojahmetov pen Táńirbergen Tolǵanbaevqa qurmet kórsetildi, dep habarlaıdy QazAqparat tilshisi.
Sembek Qojahmetov bıyl 95 jasqa toldy. Sembek ata 1925 jylǵy 25 qazanda dúnıege kelgen. 1942 jyly mektep qabyrǵasynda júrgen 17 jasar bozbala Keńes armııasy qataryna alynǵan. Urys kezinde birneshe ret jaraqattandy. Shaıqasta batyrlyq pen erlik kórsetkeni úshin ІІ dárejeli Otan soǵysy ordenimen, «Berlındi alǵany úshin», «1941-1945 jyldary Uly Otan soǵysynda Germanııany jeńgeni úshin» jáne basqa medaldarmen marapattaldy. 1951 jyly áskerden eline oralǵan. 1951 jyldan 1976 jylǵa deıin ishki ister organdarynda túrli qyzmet atqardy. Іshki ister organdary qataryndaǵy qyzmeti úshin «El ıgiligine eseli eńbegi», «1,2,3 dárejeli ІІO-da múltiksiz qyzmeti úshin», «Qoǵamdyq» tártipti qorǵaýdaǵy úzdik qyzmeti úshin», «Eńbek ardageri» medaldarymen qatar, kóptegen qurmet gramotalarymen, baǵaly syılyqtarmen marapattaldy.
Al Táńirbergen Tolǵanbaev 1923 jyly 7 mamyrda týǵan. 1934 jyly Aqsý qazaq orta mektebin bitirip, 1942 jyly 19 jasynda Keńes áskeriniń qataryna alyndy. T. Tolǵanbaev Dnepr úshin bolǵan shaıqasta óz atyn óshpes dańqqa bóledi. «Germanııany Uly Otan soǵysynda jeńgeni úshin», «Erligi úshin», «Keńes mılıtsııasyna 50 jyl» medaldarymen jáne kóptegen qurmet gramotalarymen, baǵaly syılyqtarmen marapattaldy. Soǵystan elge aman-esen oralǵannan keıin Taldyqorǵan oblysy, Aqsý aýdanynyń ishki ister organdarynda 1951 jyldan 1975 jylǵa deıin ártúrli qyzmetter atqardy.
«Almaty oblysynda ishki ister organdarynda qyzmet etken eki soǵys ardageri, soǵys ardagerlerine teńestirilgen 5 tulǵa, soǵys ardagerleriniń 6 jubaıy jáne tylda eńbek etken 12 ardager bar. Otan aldyndaǵy ólsheýsiz eńbegi úshin atalǵan ardagerderge Otan soǵysyndaǵy jeńistiń 75 jyldyǵyna oraı qurmet kórsetilip, oblystyq Polıtsııa departamenti tarapynan syılyqtar tabys etildi»,- dedi Almaty oblysy Polıtsııa departamenti bastyǵynyń birinshi orynbasary polıtsııa polkovnıgi Serik Júnisbekov.
