Almaty oblysynda polıtsııa qyzmetkeri kólikti órtten aman alyp qaldy
TALDYQORǴAN. QazAqparat - Almaty oblysyndaǵy jolda polıtsııa qyzmetkeri órtenip bara jatqan kólikti toqtatyp, kólikti órtten aman alyp qaldy, dep habarlaıdy QazAqparat tilshisi.
Oblystyq Polıtsııa departamenti baspasóz qyzmetiniń málimetinshe, oqıǵa 8 qarasha kúni saǵat 13:20 shamasynda bolǵan. «Bort 249» patrýldik polıtsııa jasaǵy komandıriniń mindetin atqarýshy polıtsııa aǵa leıtenanty Darhan Tanabaev Talǵar-Esik-Báıdibek bı jolymen bir baǵytta kele jatqan júk Gazelindegi tútindi baıqaǵan. Polıtsııa qyzmetkeri kólikti dereý toqtatyp, órt sóndirgishti paıdalanyp, tez tutanyp janyp jatqan jalyndy aýyzdyqtaǵan. Polıtsııa qyzmetkerlerine ótip bara jatqan júrgizýshiler de kómek kórsetken.
Júk kóliginde Túrgen aýylyndaǵy tapsyrys berýshige arnalǵan qaǵaz, tez tutanatyn qoraptar bolǵan eken. Keıinirek órttiń elektr symdarynyń qysqa tuıyqtalýynan oryn alǵany anyqtaldy. Júrgizýshi kólik pen júktiń órtenýin boldyrmaı, jedel, ári ýaqtyly kómek kórsetken qutqarýshylarǵa alǵysyn bildirdi.
