Almaty oblysynda polıtseılerdiń ar-namysyna tıgen azamat 20 kúnge qamaldy
Almaty oblystyq Polıtsııa departamenti baspasóz qyzmetiniń málimetinshe, 13 mamyr kúni Taldyqorǵandaǵy mamandandyrylǵan aýdanaralyq ákimshilik soty qalanyń 48 jastaǵy turǵynyn 20 kúnge qamaý týraly qaýly shyǵardy. Kináli dep tanylǵan azamat Almaty oblystyq Polıtsııa departamentiniń «Taldykorgan-Police» resmı paraqshasy arqyly tártip saqshylaryna jalǵan jala jaýyp, ar-namysyna tıetin pikir jazǵan.
Daýdyń basy 27 sáýirde bastalǵan. Dál sol kúni polıtsııaǵa «Toıota Land Krýzer» kóligin kámelettik jasqa tolmaǵan balanyń júrgizip júrgeni jáne onyń jol erejesin buzǵany jóninde shaǵym túsken.
Aqparat rastalǵan. Tártip saqshylary kólikti taýyp, aıyp turaǵyna qoıǵan jáne jasóspirimderdiń kim ekenin anyqtaǵan. Polıtseıler atalǵan is boıynsha ákimshilik hattama toltyryp, kámelettik jasqa tolmaǵan balany ata-anasyna tapsyrǵan.
Biraq, sot sheshimimen kináli dep tanylǵan azamat tártip saqshylaryna jala jaýyp, áleýmettik jeli arqyly ar-namysyna tıgen.
«Abylaı jáne Aıdar - sizderdiń patrýldik qyzmetkerlerińiz.... Olardyń ata-anasyna aıta baryńyzdar, aqsha bopsalaıtyndar men alaıaqtardy tárbıelegen»,- dep jelige jazǵan.
Jaǵymsyz pikir jazǵan azamat sot sheshimimen 20 kúnge qamaýǵa alyndy.