Almaty oblysynda polıtseıdi urǵan turǵyn ustaldy
TALDYQORǴAN. QazAqparat - Almaty oblysynda polıtseıge qarsylyq kórsetip, judyryq jumsaǵan turǵyn ustaldy. Oqıǵa Alakól aýdanyndaǵy Úsharal qalasynyń mańynda bolǵan, dep habarlaıdy QazAqparat tilshisi.
Almaty oblystyq ІІD baspasóz qyzmetiniń málimdeýinshe, iri qara mal men et tasymaldap bara jatqan azamatty tekserý kezinde onyń eshqandaı ruqsat qujattary bolmaǵany anyqtalǵan. Oqıǵa 1 shildede Úsharal mańyndaǵy baqylaý beketinde tirkeldi. Kólikti tekserý barysynda júrgizýshi qarsylyq kórsetip, qujattaryn bermegen.
«Sondaı-aq 40 jastaǵy azamat polıtsııa qyzmetkeriniń betinen judyryqpen uryp jibergen. Atalmysh fakti boıynsha Alakól aýdandyq ІІB qyzmetkerleri QR QK-niń 380-baby boıynsha sotqa deıingi tergeý jumystaryn bastady. Júrgizýshi júgimen birge aýdandyq ishki ister bólimine jetkizildi. Ustalǵan azamat Alakól aýdanynyń turǵyny», - dep tolyqtyrdy baspasóz qyzmetinde.
