Almaty oblysynda polıtseı ózine qol jumsamaq bolǵan azamatty qutqaryp qaldy
TALDYQORǴAN. QazAqparat - Almaty oblysynda 3 qarjy termınalyn buzyp, 64 myń teńgeni qoldy qylǵan azamat asylyp ólmek bolǵan. Ony polıtsııa qyzmetkeri qutqaryp qaldy. Oqıǵa Alakól aýdanynyń Úsharal qalasynda tirkeldi, dep habarlaıdy QazAqparat tilshisi.
Qarashanyń 23-ne qaraǵan túni belgisiz bireý aýdan ortalyǵyndaǵy úsh termınaldy buzyp, ishindegi 64 myń teńgeni ıelengen. Osy fakti boıynsha jergilikti polıtsııa qyzmetkerleri qylmystyq is qozǵap, kúdiktini anyqtaýǵa kirisedi.
Іzdestirý barysynda kúdikti 25 jastaǵy Eńbekshi aýylynyń turǵyny ekeni belgili boldy. Aqparatty anyqtaý barysynda aýdandyq qylmystyq izdeý bóliminiń leıtenanty Dastan Álimjanov keleńsiz oqıǵanyń kýási boldy. Qonaq úıdiń bólmesinde esikti ishinen bekitip alǵan er azamat beldigine asylyp ómirimen qosh aıtyspaq bolǵan. Kúdiktiniń tunshyǵyp qoryldaı bastaǵanyn estigen polıtseı qosymsha kiltpen esikti ashyp, kúdiktini beldiginen sheship, aýrýhanaǵa jetkizgen. Qazirgi tańda ol jansaqtaý bóliminen palataǵa kóshirildi.
Almaty oblystyq polıtsııa departamentinde termınal tonaý faktisi boıynsha tergeý jalǵasyp jatqandyǵyn jáne urlanǵan qarjynyń basym bóligi men termınaldy ashý quraly aıǵaq zat retinde iske tirkelgenin málimdedi. Termınal ıelerine 700 myń teńgeden astam zalal keltirilgen. Atap óterligi kúdiktiniń ata-anasy polıtsııa bóliminiń qyzmetkerlerine balasyn ólim aýzynan alyp qalǵany úshin alǵystaryn bildirdi.
