Almaty oblysynda polıtseı aýrýhananyń terezesinen sekirmek bolǵan adamdy qutqaryp qaldy
TALDYQORǴAN. QazAqparat - Almaty oblysynyń Uzynaǵash aýylyndaǵy aýdandyq aýrýhananyń úshinshi qabatynan sekirmek bolǵan adam qutqaryldy. Onyń ómirin polıtseı Almas Qusaıynov saqtap qaldy, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, 4 maýsym kúni Jambyl aýdandyq aýrýhanasyna kúızeliste júrgen 45 jastaǵy er adam túsken. Ol kóp ýaqyttan beri ishimdikke salynyp, dárigerlerdiń kómegine muqtaj bolǵan. Biraq ol emdik sharalaryn tolyq almaı, bas tartyp, aýrýhanadan ketetinin aıtqan.
Biraq talabyn oryndata almaǵan naýqas óz-ózine qol jasaıtynyn aıtyp, aýrýhananyń úshinshi qabatyndaǵy terezesine shyǵyp ketken. Medıtsına qyzmetkerleri polıtsııa, tótenshe jaǵdaı qyzmetin oqıǵa ornyna shaqyrǵan. Mamandar dereý jetip, terezeniń astyna matras salyp, er azamatqa mundaı qatelik jasamaýdy ótingen. Biraq nátıje shyqpaǵan. Sońynda, qulap bara jatqan er adamdy polıtseı Almas Qusaıynov ustap qalyp, palataǵa alyp kirgen.
Jambyl aýdanynyń polıtseıi Ashat Tegenbaevtyń aıtýynsha, óz-ózine qol jumsamaq bolǵan adam Almaty qalasynyń turǵyny. Ol Uzynaǵashqa kelip, birneshe kún ishimdik ishken. Ony týystary aýrýhanaǵa jatqyzǵan. Qazir 45 jastaǵy azamat týystarynyń qolyna qaıta tapsyryldy. Al polıtsııa er adamdy óz-ózine qol jumsaýǵa ne ıtermelegeni jóninde tekserý júrgizedi.
