Almaty oblysynda petroglıfter joıylyp barady
TALDYQORǴAN.QazAqparat - Almaty oblysynda Malaısary petroglıfteri joıylyp barady. Dál osylaı dep Kerbulaq aýdanyna qarasty Malaısary aýylynyń turǵyndary dabyl qaǵýda, dep habarlaıdy QazAqparat tilshisi.
Kóneden syr shertetin sýretterden qol úzip qalamyz dep alańdaǵan aýyl turǵyndarynyń biri Qojaqan Úderbaı. Onyń aıtýynsha, tasqa qashap salynǵan sýretterdi tas óńdeıtin kásiporyndar oıyp-opyryp, áketip jatyr.
Al jergilikti bılik qundy derekke toly aımaqta kásiporyndar zańdy túrde jumys istep jatqanyn aıtady.
«Sarybastaý aýyldyq okrýgine qarasty saıy óńdeýge berilgen jerler. Sol jaq sheti qıyrshyq tas zaýytyna, oń jaǵynda «Tatarka ltd» fırmasy istep jatyr. Sýreti bar bolǵanymen zerttelmegendikten, qolǵa alynbaǵandyqtan eshqandaı shekteý joq. Olar zańdy túrde memlekettik aktisin alyp, salyǵyn tólep, jumys istep jatyr», - deıdi Kerbulaq aýdanyna qarasty Sarybastaý aýyldyq okrýginiń ákimi Qaırat Sultanbekov.
Talqandalyp jatqan tastardyń jaı-kúıi ásirese áleýmettik jelide qyzý talqylanyp, alańdaýshylyq bildirgenderdiń qatary kún sanap ósýde. Osyndaı jazbalardan keıin ǵalymdar da iske kirisken syńaıly. Máselen, belgili jýrnalıst Serik Ábikenuly óziniń jelidegi paraqshasyna kóne sýretter jaıly alǵashqy qýanyshty habarymen bólisken.
«Bir jaqsy jańalyq! Bir aptadan beri Malaısary aýyly mańyndaǵy Arqarly qyratyndaǵy petroglıfter týraly jazyp edik, búgin sol jerge professor A. Marıashev bastaǵan top baryp, tanysty. Sýretter erte qola, qola, erte temir dáýirleriniki eken! Myna taýlardy b.d.d. 2000(!) jyl buryn adamdar meken etken! Oblys, tutas Qazaqstan úshin ǵajap jańalyq emes pe?! Shuǵyl barǵan prof. Marıashevke, Qarabatyr qaǵan, Olga Gýmırovaǵa raqmet. Ásirese osy sýretterdiń jurnaǵy qalmaıdy-aý dep jýrnalısterge, ǵalymdarǵa jol kórsetip júrgen Qaısar Egizekov, Qojahan aǵa Ýderbaevqa myń alǵys!»,- dep jazǵan. S. Ábikenuly.
Almaty oblystyq mádenıet basqarmasynyń feısbýk jelisindegi resmı paraqshasyna Aqan Ábdýalıevtiń de petroglıfterdiń máselesi jónindegi pikiri jarııalanǵan.
«Oryn alǵan oqıǵaǵa qatysy barlar jazalana ma? Iá. Eń aldymen, ashylǵanyna on jyl bolsa da, isti keıinge sozyp kelgen «Tarıhı-mádenı murany qorǵaý jónindegi Almaty oblystyq ortalyǵyna» shara qoldanyp, jumystaryn qatań baqylaýǵa alamyz. Al, tańbaly tastardy qoparýshylarǵa jekeshe jer bolǵandyqtan, eshkimge de tıispe deı almaımyz. Sonda da bizdiń jáne aýdannyń tarapynan túsindirý jumystary júrgizilip, baqylaýda tur. Ýaqyty kelip, memleket qorǵaýyna alynǵanda, bul másele de óz sheshimin tabatyn bolady»,- degen oblystyq mádenıet, arhıvter jáne qujattama basqarmasynyń basshysy Aqan Ábdýalıev.
