Almaty oblysynda paıdalanylmaı jatqan 61 myń ga jer memleketke qaıtaryldy

TALDYQORǴAN. QazAqparat - Almaty oblysynda paıdalanylmaı jatqan 61 myń gektar jer memleket menshigine qaıtaryldy. Bul jóninde óńir ákimi Qanat Bozymbaev Uıǵyr aýdany turǵyndarymen kezdesý barysynda aıtty, dep habarlaıdy QazAqparat tilshisi.

Jer máselesimen arnaıy oblystyq komıssııa aınalysyp jatyr. Qazir olar Panfılov aýdanynda jumys isteýde.

Oblys ákiminiń aıtýynsha, qabyldanǵan sharalardyń nátıjesinde jalpy 61 myń gektar jer memleket menshigine qaıtaryldy, 167 myń gektarǵa qatysty materıal qaralyp jatyr.

Q.Bozymbaevpen kezdesýde Uıǵyr aýdany turǵyndarynyń basym bóligi egistik, jaılym jerlerdiń joqtyǵyna qatysty suraqtar qoıdy.

«Oblys ákimi bolǵaly beri 12 aýdan men qalada turǵyndarmen kezdesý ótkizdim. Osy kezdesýlerde áleýmettik sıpattaǵy 200-den astam problemalyq másele kóterildi. Bul rette árbir aýdanda paıdalanylmaıtyn jer ýchaskeleri, jeke mal jaıatyn jaıylymnyń joqtyǵy týraly aıtyldy. Sońǵy jyldary Uıǵyr aýdanynyń turǵyndary jaıylymdyq jáne turǵyn úı qurylysy úshin jerdiń jetispeýi, aýyl sharýashylyǵy jerlerin konkýrs boıynsha alý, iri sharýashylyqtardyń paıdalanýsyz jerlerin qaıtarý máselelerin jıi kóterip júr. Sýarý júıelerin jóndeýde aýdan basshylyǵynyń naqty sharalar qabyldamaýy da narazylyq týdyryp otyr», - dep atap ótken Qanat Bozymbaev osy máselelerge baılanysty aýdan basshylyǵyna tıisti tapsyrmalar berdi.

Eske salaıyq, bıyl 24 aqpanda Almaty oblysynyń ákimi Qanat Bozymbaev jýrnalıstermen ótken brıfıngide óńirde paıdalanylmaı jatqan jerlerdi memleket menshigine qaıtarý úshin arnaıy komıssııa jumysqa kirisetinin aıtqan bolatyn.