Almaty oblysynda patrýldik polıtsııa kúsheıtilgen tártipke kóshirildi

TALDYQORǴAN. QazAqparat- Almaty oblysyndaǵy avtojoldarda «Qaýipsiz jol» jedel-aldyn alý is-sharasy bastaldy, dep habarlaıdy QazAqparat tilshisi.

Keń aýqymda uıymdastyrylǵan sharanyń basty maqsaty – jol-kólik apattarynyń aldyn alý, onyń qaıǵyly saldaryn boldyrmaý jáne jol júrý erejesin buzýǵa jol bermeý.

«Qazirgi ýaqytta patrýldik polıtsııanyń jeke quramy kúsheıtilgen tártipte qyzmet atqarýǵa kóshirildi. Polıtsııa narıadtarynyń sany artyp, joldarǵa, eldi mekenderge jáne kóshe qıylystaryna basa nazar aýdarylýda. Patrýldik polıtseılerdiń mindeti men jumys ádisi naqtylandy. Olar avtopatrýldeýdi, jaıaý patrýldeýdi, sondaı-aq jol qozǵalysyna qatysýshylardy qadaǵalaýdy júzege asyrady»,- dep málimdedi oblystyq PD baspasóz qyzmetinen.

Reıdtik sharalar barysynda jol júrý erejesin buzýdyń derekteri anyqtalady jáne aldyn alý sharalary qabyldanady. Onyń ishinde qarapaıym qatelikten bastap, kólikti masań kúıde basqarý, joldyq qarsy baǵytyna shyǵý, qaýipsizdik beldigin taqpaý, qozǵalys barysynda telefondy paıdalaný, apattyq jaǵdaıdaǵy kóliktermen júrý sııaqty zańdy óreskel buzý derekteri de áshkerelenedi.

Jol qozǵalysyn jiti baqylaýǵa baǵyttalǵan arnaıy shara 12 aqpanda bastalyp, úsh kúnge jalǵasady.