Almaty oblysynda páterleri órtengen 14 otbasy baspanaly boldy
TALDYQORǴAN. QazAqparat - Astananyń 20 jyldyq mereıtoıy qarsańynda Jansúgirov aýylynyń turǵyndary úlken qýanyshqa keneldi. Byltyr kúzde páterleri órtenip, dalada qalǵan 14 otbasyǵa jańa úılerdiń kiltteri tabys etildi, dep habarlaıdy QazAqparat tilshisi.
Qonys ıelerin quttyqtaýǵa Almaty oblysy ákiminiń birinshi orynbasary Lázzat Turlashov arnaıy kelip, kópshiliktiń qýanyshyna ortaqtasty. Baspanaly bolǵan turǵyndar az ýaqytta jańa úı turǵyzyp, ıgilikterine tapsyrǵan oblys, aýdan basshylyǵyna alǵystaryn jetkizdi. Bul úıler 100 paıyz otandyq qurylys ónimderinen turǵyzylǵan. Árbiriniń kólemi 70 sharshy metr shamasynda. 1 úıdiń qurylysyna shamamen 9,5 mln teńge jumsalǵan. Aýlasyn abattandyryp, qora-qopsy salyp, ınjenerlik jelisin tartqanǵa 6,5 mln teńge bólingen. Sonda 1 úıdiń quny 16 mln, al 14 úıge 224 mln teńge qarjy ketken.
Esterińizge sala keteıik, byltyr qazan aıynda Aqsý aýdanyna qarasty І.Jansúgirov aýylynda 2 qabatty úı órtenip, 32 adam qaýipsiz jerge kóshirilgen bolatyn. Oblys ortalyǵynan 120 shaqyrym jerde ornalasqan І.Jansúgirov aýylynda órt shyqqany týraly habar tańǵy saǵat 08:00-de jetken. Órt sóndirý qyzmeti oqıǵa ornyna jetken kezde turǵyn úıdiń shatyry tolyq órtenip, ekinshi qabattyń tóbesi jana bastaǵan. 16 páterli bul úı 1959 jyly turǵyzylǵan eken.
