Almaty oblysynda páter tonaýshylar toby ustaldy
TALDYQORǴAN. QazAqparat - Almaty oblysynda polıtseıler páter tonaýshylar tobynyń múshelerin qolǵa túsirdi. Olar uzaq ýaqyt boıy bóten bireýdiń múlkin urlaýdy kásip etken, dep habarlaıdy QazAqparat tilshisi.
Almaty oblystyq polıtsııa departamenti baspasóz qyzmetiniń málimetinshe, kúdiktiler Jambyl aýdanynyń azamattary. Qazirgi tańda úsh adamnyń 40 jeke turǵyn úı jáne páter tonaý deregine qatysynyń bar ekeni dáleldenip otyr. Kúdiktilerdi jedel top Uzynaǵash aýylynda úsh mekenjaı boıynsha úılerinen qolǵa túsirgen. Toptyń bir múshesi buryn sottalǵan bolyp shyqty. Urlanǵan zattar tárkilenip, aıǵaq zat retinde materıalǵa tirkeldi. Kúdiktiler Jambyl aýdandyq polıtsııa bóliminiń ýaqytsha oqshaýlý ızolıatoryna qamaýǵa alyndy.
Tergeý barysynda jyl basynan beri bul azamattar Uzynaǵashta jáne aýdan ortalyǵyna jaqyn Qaınazar, Aqseńgir, Fabrıchnyı aýyldarynda úı tonaýdy kásip etkeni anyqtaldy.
«Keltirilgen zalal 10 mln teńgege jýyq»,- dep tolyqtyrdy oblystyq polıtsııa deparatementiniń baspasóz qyzmeti.
