Almaty oblysynda páter tonaýmen aınalysqan 128 top quryqtalǵan
TALDYQORǴAN. QazAqparat - Almaty oblysynda byltyr páter tonaýmen aınalysqan 128 top quryqtalǵan. Jalpy óńirdegi barlyq tirkelgen qylmystardyń ishinde negizgi úles bótenniń múlkin urlaýǵa qatysty bolyp otyr. Bul týraly Almaty oblysy ákimdiginde ótken jıynnyń barysynda málim boldy.
Aıta keterligi, Іshki ister mınıstrliginde bótenniń múlkin urlaýdyń aldyn alýǵa jáne urlyqtyń ashylý deńgeıin jaqsartýǵa baǵyttalǵan vedomstvolyq baǵdarlama bar. 2018-2020 jyldarǵa arnalǵan osy baǵdarlamany júzege asyrý aıasynda Almaty oblysynda birqatar naqty is-sharalar qabyldanǵan. Máselen, «Mal urlyǵy», «Páter», «Sotka», «Ýgon» sekildi 12 nysanaly jedel aldyn alý sharalary júzege asty.
«2018 jyly 6,5 myń urlyq ashyldy, 463 qylmysker urylar toby quryqtaldy. Olardyń ishinde 128-i páter tonaýmen aınalysqandar bolsa, 71 top mal urlyǵyn kásip etken. Mundaı qylmystyń saldarynan japa shekkenderge 80 mıllıon teńgege jýyq materıaldyq shyǵyn óteldi, biraq bul keltirilgen shyǵynnyń tek 52,39 paıyzy ǵana», - deıdi Almaty oblysy Polıtsııa departamentiniń bastyǵy general-maıor Murat Urumhanov.
Onyń sózine qaraǵanda, oblys aýmaǵynda urlanǵan 1145 mal basy ıelerine qaıtarylǵan, bul jalpy qoldy bolǵan maldyń 62,1 paıyzy. Sonymen qatar, polıtsııa qyzmetkerleri tıisti qujaty joq maldy áketip bara jatqan 40 faktini tirkegen. Bul rette zań buzýshylarǵa salynǵan aıyppul 3 mln teńgeni quraǵan.
