Almaty oblysynda páter tonap júrgen shetel azamaty ustaldy

TALDYQORǴAN. QazAqparat - Almaty oblysynda páter tonap júrgen shetel azamaty ustaldy. 50 jastaǵy er adam Moldova eliniń azamaty ekeni anyqtaldy, dep habarlaıdy QazAqparat tilshisi.

Shetel azamatyn Qarasaı aýdandyq ІІB-nyń polıtseıleri qolǵa túsirdi.  Tártip saqshylary kúdiktiniń bir aıdyń ishinde tonalǵan 10 páterdiń isine qatysy bar ekenin dáleldep bergen. Al ustalǵan azamat kóbine  saıajaılardaǵy úılerdi tonaýmen aınalysqan.

Moldovalyqtyń sózinshe, onyń Qazaqstanǵa kelgenine bir jyldan asqan. Jáne ol tólqujatyn joǵaltyp aldym dep aqtalypty. Al óziniń týǵan elinde otbasy bar eken.

«Qazirgi tańda kúdiktiniń aty-jóni jáne  túsiniktemesi arnaıy baza arqyly tekserilip jatyr. Sondaı aq, onyń ózge de qylmystarǵa qatysy bar-joǵy anyqtalatyn bolady», - dep málim etti oblystyq ІІD baspasóz qyzmeti.

Qazir atalǵan fakti boıynsha qylmystyq is tergelip jatyr. Al kúdikti qamaýǵa alyndy.