Almaty oblysynda paraplanmen ushýdan Álem kýbogy sarapqa salynýda
TALDYQORǴAN. QazAqparat - Almaty oblysynda paraplanerlik sporttyń jerge dálme-dál qoný jarysy boıynsha Álem kýbogynyń týrnıri bastaldy. Jarysqa 14 memleketten 100-ge jýyq sportshy qatysýda, dep habarlaıdy QazAqparat tilshisi.
Jońǵar Alataýynyń teriskeıi osy sport túrimen aınylysýǵa óte qolaıly aımaq. «Taý Jetisý» demalys aımaǵy mańynda qatysýshy memleketterdiń týy jelbirep, aspanda paraplandar qalyqtap halyqaralyq jarys joǵary deńgeıde ótip jatyr. Ony týrnırge qatysyp jatqan sheteldik paraplanershiler de tilge tıek etip, qazaq halqynyń qonaqjaılyǵyn aıtýda.
Jalpy bul sport túri ózge sport túrlerine qaraǵanda ekstrımaldy dep esepteledi. Jarystyń basty sharty 200 metrge jýyq bıiktikten tómen qaraı qustaı qalqyp, jerdegi nysanaǵa dóp túsý. Jetisý tórindegi saıysta ár sportshy 6 ret ushyp qoný múmkindigine ıe. Aýa raıynyń qolaılyǵyna baılanysty osy ýaqytta týrnırdiń alǵashqy ár sportshysy 4 ret aspanǵa kóterilip úlgerdi.
Qazaqstan paraplaner sporty federatsııasynyń prezıdenti Igor Vershkı elimizde bul sporttyń qarqyndy damyp kele jatqanyn aıtady. Álem kýbogyna el namysyn qorǵap 20-ǵa jýyq paraplanershi qatysýda. Osy jolǵy jarystan keıin Qazaqstan álem chempıonatyn ótkizýge ábden bolady degen senimde. Al álem kýbogyn sarapqa salǵan týrnır úsh kún jalǵasady.
